Moderna men Merck farmasevtıkalyq kompanıalary ázirlegen teri qaterli isigine qarsy jańa jekelendirilgen vaksına klınıkalyq synaqtarda úmit kúttiretin nátıje kórsetti: melanomamen aýyratyn naýqastarda operasıadan keıin ımmýnoterapıany jalǵyz qoldanǵanǵa qaraǵanda, qaıtalaný sırek baıqalǵan, dep habarlaıdy infohub.kz saıty.
Intismeran dep atalatyn preparat ár pasıentke jeke jasalady. İsikti alyp tastaǵannan keıin adamnan kishkene fragment alyp, onyń DNQ-syn taldaıdy. Sodan keıin ǵalymdar dál osy isikke tán mýtasıalardy anyqtap, solardyń negizinde jekelendirilgen mRNQ vaksınasyn jasaıdy. Ol ımýndyq júıeni qalǵan qaterli jasýshalardy tanýǵa jáne olarǵa shabýyl jasaýǵa «úıretýi» tıis. Uqsas prınsıp keıbir COVID-19 vaksınalarynda qoldanylǵan.
Klınıkalyq zertteýdiń úshinshi fazasyna joǵary qaýipti melanomasy (II, III nemese IV kezeń) bar 1000-nan astam pasıent qatysty. Qatysýshylardy toptarǵa bóldi: bireýleri tek Keytruda preparatyn aldy, al basqalary Keytruda-ny jekelendirilgen vaksınamen birge aldy. Aldyn ala nátıjeler boıynsha, eki preparattyń kombınasıasy pasıentterdiń qaterli isik belgilerinsiz ómir súrý ýaqytyn aıtarlyqtaı uzartty jáne aýrýdyń basqa organdarǵa taralý qaýpin tómendetti. Degenmen, bul áserdiń qansha ýaqyt saqtalatyny ázirge belgisiz.
Ǵalymdar baǵalaýda saqtyq tanytýda. Cancer Research UK uıymy zertteý «úmit kúttiretin nátıjeler kórsetip otyr» dep málimdedi, alaıda derekterdi áli de tolyq zerttep, tekserý qajet. Oksford ýnıversıtetiniń konsýltanty jáne dosenti, onkolog Lennard Lı nátıjelerdi melanomamen aýyratyn pasıentter úshin jaqsy jańalyq dep atady. Biraq nátıjeler ázirge táýelsiz sarapshylardyń resenzıasynan ótpegen, sondyqtan túpkilikti qorytyndy jasaýǵa áli erte.
Moderna men Merck ókpe, qýyq jáne búırek qaterli isigin emdeýge arnalǵan uqsas jekelendirilgen vaksınalardy da zerttep jatyr.