Venesýelanyń ýaqytsha prezıdenti Delsı Rodrıges halyqqa úndeýinde AQSH-pen munaı kelisimi aıasynda el alatyn tabystar týraly habarlady, dep habarlaıdy infohub.kz saıty.
Onyń aıtýynsha, tabys shamamen 209 mlrd AQSh dollaryn quraýy múmkin, ıaǵnı óndirilgen jáne satylǵan árbir barelden shamamen 19 dollar. «Naqtyraq aıtqanda, bul óndirilgen jáne satylǵan árbir barelden shamamen 19 dollar tikeleı bizdiń elge túsedi», — dedi saıasatker.
Kelisim memleket paıdasyna roıaltı men tabys salyǵyn qarastyrady. Atap aıtqanda, Orınoko munaı beldeýinde ıgeriletin segiz jańa blok úshin eń tómengi roıaltı 16%, al tabys salyǵy 34% quraıdy. Rodrıgestiń aıtýynsha, esepteýler barreline 65 dollar baǵasymen jasalǵan.
Bul kelisim 25 jylǵa eseptelgen jáne táýligine 1,5 mln barelden astam óndiriske jetý úshin 17 strategıalyq ken ornyn ıgerýdi kózdeıdi. «Venesýela onyń ornyna óndiristi, jumys oryndaryn, ınfraqurylymǵa ınvestısıalardy, memleket úshin úlken tabystardy jáne ulttyq ónerkásip úshin óndiristik tizbekterdi alady», — dedi Rodrıges.
Saıasatker Venesýelanyń energetıkalyq derjavaǵa, iri munaı óndirýshige, mańyzdy gaz eksporttaýshyǵa aınalýǵa jáne ulttyq munaı hımıasyn damytýǵa umtylatynyn qosty. Eske salaıyq, keshe AQSh prezıdenti Donald Tramp Venesýelamen «álem tarıhyndaǵy eń iri» munaı kelisiminiń jasalǵanyn jarıalady.