Qazaqstandyq sportshy Vıktor Drýzın Býdapeshte ótip jatqan artısıkalyq júzýden jasóspirimder álem chempıonatynda taǵy da mártebeli tuǵyrǵa kóterildi. Jarystyń sońǵy kúni ol erler arasyndaǵy jeke erkin baǵdarlamada qola medal jeńip aldy, dep habarlaıdy infohub.kz saıty.
Drýzın óneri úshin 257,1 upaı aldy. Altyndy 267,0 upaı jınaǵan reseılik Zahar Trofımov, kúmisti 264,4 nátıjemen ıspanıalyq Eneko Sanches Agılar ıelendi.
Bul Vıktordyń bıylǵy álem birinshiligindegi ekinshi qolasy. Buǵan deıin, 12 tamyzda ol tehnıkalyq soloda úshinshi oryn alǵan edi, onda júldeli úshtik birdeı boldy: Trofımov jeńse, Sanches Agılar ekinshi orynǵa turaqtady.
Drýzınniń qolasy 2026 jylǵy jasóspirimder álem chempıonatyndaǵy qazaqstandyq quramanyń tórtinshi medali boldy. Aldyńǵy kúni Iasmına Islamova men Aldıar Ramazanov aralas dýetterdiń erkin baǵdarlamasynda kúmis jeńip alsa, Qazaqstan komandalyq akrobatıkalyq baǵdarlamada da kúmis júldege ıe boldy.
Jasóspirimder álem chempıonaty (U19) Býdapeshte 12-16 tamyz aralyǵynda ótýde, oǵan 35 elden 300 sportshy qatysýda. Barlyǵy 11 júlde jıyntyǵy oınatylady. Qazaqstan atynan 12 sportshy synǵa túsýde.