Qazaqstandyq boksshy Jánibek Alımhanulynan dıskvalıfıkasıa merziminen buryn alynyp, ol WBO nusqasy boıynsha sýper orta salmaqta álem chempıony ataǵyna úmitker bolyp taǵaıyndaldy, dep habarlaıdy infohub.kz saıty.
Dúnıejúzilik boks uıymynyń (WBO) saıtynda Álem chempıonattary komıteti sýper orta salmaqta WBO álem chempıony ataǵyna úmitkerdi taǵaıyndaý týraly sheshim qabyldaǵanyn málimdedi.
«Komıtet Jánibek Alımhanulyn eń joǵary reıtıńke ıe boksshy dep anyqtaıdy, ol Álem chempıonaty komıtetiniń pikirinshe, mindetti úmitker mártebesin berý úshin qoldanylatyn ólshemsharttarǵa barynsha sáıkes keledi. Osylaısha, Komıtet Jánibek Alımhanulyn WBO nusqasy boıynsha sýper orta salmaqta álem chempıony ataǵyna mindetti úmitker, demek, qazirgi WBO álem chempıony Hamza Shırazdyń tıtýlyna mindetti úmitker etip taǵaıyndaıdy», — delingen qujatta.
Sondaı-aq komıtet Jánibek Alımhanulynyń dopıng-test nátıjelerine baılanysty dıskvalıfıkasıasy 2026 jyldyń 10 shildesinen bastap toqtatylǵanyn, bul qazaqstandyq boksshynyń chempıonatqa qatysý kandıdatýrasyn qaraýǵa múmkindik bergenin habarlady. Sonymen qatar, dıskvalıfıkasıanyń toqtatylýy negizgi tártiptik isti joımaıtyny jáne buzýshylyq bolmaǵanyn bildirmeıtini atap ótildi.
Eske salaıyq, 2025 jyldyń 6 jeltoqsanynda ótýi tıis úsh tıtýl úshin jekpe-jek aldynda Jánibek Alımhanuly dopıng daýynyń ortasynda qaldy. Dúnıejúzilik boks uıymy (WBO) qazaqstandyq Jánibek Alımhanulynyń dopıng-testi oń nátıje bergenin resmı rastady. Tergeý bastaldy. Keıin uıym Jánibekti belbeýden aıyrmaǵanymen, qazaqstandyqty bir jylǵa — 2026 jyldyń jeltoqsanyna deıin dıskvalıfıkasıalaǵany habarlanǵan bolatyn. Sonymen qatar, buǵan deıin WBO basshysy Gýstavo Olıverı The Ring basylymyna qazaqstandyq Jánibek Alımhanuly orta salmaqtaǵy tıtýldan bas tartyp, sýper orta salmaqqa aýysatynyn málimdegen edi.