Qazaqstannyń Saýda mınıstrligi Wildberries kompanıasy respýblıkaǵa qosymsha qoıma alańdaryn ornalastyrý týraly resmı ótinish bermegenin málimdedi. Alaıda mundaı usynys túsken jaǵdaıda, ol eldiń ulttyq múddeleri men zańnamasyn eskere otyryp qaralady, dep habarlaıdy infohub.kz.
Buǵan deıin BAQ-ta Wildberries Reseıdegi logıstıkalyq ortalyqtaryna ushqyshsyz ushý apparattary shabýyl jasaǵannan keıin Qazaqstannan qoıma alańdaryn izdep jatqany týraly aqparat tarady. Mınıstrlik búginde marketpleısten resmı ótinish túspegenin atap ótti.
«Mınıstrlik úshin halyqaralyq kompanıalardyń kez kelgen jobalary ózara tıimdi negizde, eldiń ulttyq múddelerin eskere otyryp júzege asyrylýy, otandyq kásipkerlerge qosymsha múmkindikter týǵyzýy jáne Qazaqstan ekonomıkasyna ınvestısıalarmen qatar júrýi mańyzdy», – dedi vedomstvo ókilderi.
Mınıstrlik Qazaqstannyń tranzıttik jáne logıstıkalyq áleýeti eleýli ekenin, zamanaýı qoıma ınfraqurylymyn damytý, jańa jumys oryndaryn qurý jáne transshekaralyq elektrondy komersıany damytý jónindegi ınvestısıalyq jobalardy qoldaıtynyn eske saldy. Sonymen qatar barlyq proses QR zańnamasymen jáne EAEO normalarymen retteledi, naryqtyń jekelegen qatysýshylaryna erekshe jaǵdaılar jasalmaǵan.
18 shildeden bastap Wildberries-tiń Reseıdegi qoımalaryna ushqyshsyz ushý apparattarynyń aýqymdy shabýyldary jasalýda. Sankt-Peterbýrg, Máskeý oblysy, Qyrym, Tambov jáne Voronej oblystary, Stavropol jáne Krasnodar ólkelerindegi logıstıkalyq parkter zardap shekti. Osydan keıin marketpleıs Qazaqstannan jalpy aýdany 100 myń sharshy metr bos qoıma úı-jaılaryn izdeı bastady. Alaıda qolaıly nysan tabý ońaı bolmaıdy: NF Group derekteri boıynsha, 2025 jyldyń sońynda elde 1,9 mln sharshy metr sapaly qoıma bolǵan, olardyń tek 5,8 paıyzy ǵana bos.