Jaqynda paıdalanýshylar Windows 11 júıesindegi kompúterlerdi tikeleı smartfondarynan basqara alady. Microsoft Android qurylǵylarynan kompúterdi qashyqtan óshirý jáne qaıta júkteý fýnksıasyn synaqtan ótkizip jatyr, dep habarlaıdy infohub.kz saıty.
Ázirleýshiler Android smartfondaryn kompúterlermen baılanystyratyn Link to Windows mobıldi qosymshasyna jańartý daıyndap jatyr. Qazir baǵdarlama habarlandyrýlardy kórýge, habarlamalardy oqýǵa jáne qońyraýlarǵa tikeleı kompúterden jaýap berýge múmkindik beredi. Jańa opsıa kompúterdi qashyqtan óshirýge, uıqy rejımine jiberýge nemese qaıta júkteýge múmkindik beredi.
Bul fýnksıa úıden nemese keńseden shyqpas buryn kompúterdi óshirýdi umytyp ketetin paıdalanýshylar úshin paıdaly bolady. Sonymen qatar, qosymsha kodynan operasıalyq júıeniń qalǵan jańartýlaryn ornatý úshin óshirý nemese qaıta júkteý aldynda arnaıy komandalar týraly eskertýler tabyldy.
Kompanıa kezdeısoq áreketterden qorǵaýdy jáne qalqymaly eskertýlerdi de qarastyrdy. Mysaly, kompúterdi uıqy rejımine jibergende, qosymsha qurylǵylar arasyndaǵy baılanys úziletinin jáne kompúterdi tek qolmen oıatýǵa bolatynyn eske salady. Qazir bul qural synaq satysynda jáne ázirge kóptegen paıdalanýshylarǵa qoljetimsiz.