Gennadı Golovkın basqaratyn World Boxing halyqaralyq federasıasy resmı saıtynda reseılik boksshylardan shekteýlerdi alyp tastaǵanyn habarlady, dep habarlaıdy infohub.kz.
Uıymnyń atqarý komıteti Glazgoda Los-Andjelestegi 2028 jylǵy Olımpıadaǵa daıyndyqqa qatysty keń aýqymdy máselelerdi qarap, tıisti sheshim qabyldady.
World Boxing Reseı ókilderi basqa elderdiń sportshylarymen teń dárejede, ıaǵnı ulttyq rámizdermen (tý jáne ánuran) óner kórsete alatynyn belgiledi. Sonymen qatar reseılik delegasıalardyń minez-qulqy men dopıngke qarsy erejelerdi saqtaýy qatań baqylanatyn bolady.
Sondaı-aq atqarý komıteti Astana qabyldaıtyn 2027 jylǵy álem chempıonatyna daıyndyq máselelerin talqylap, 2028 jylǵy Olımpıadanyń irikteý týrnırleriniń kúntizbesin bekitti.
«Búgingi talqylaýlar men sheshimder Álemdik boks federasıasynyń rıng ishinde de, syrtynda da qol jetkizgen eleýli progresin kórsetti. Olımpıadalyq irikteýdi ótkizý oryndaryn qamtamasyz etýden bastap, basqarý júıesin nyǵaıtý, jahandyq múshelikti keńeıtý jáne Kongreske daıyndyqqa deıin — biz olımpıadalyq qozǵalys aıasynda bokstyń tabysty bolashaǵyn qamtamasyz etýge daıyn, kúshti ári ashyq uıym quryp jatyrmyz», — dedi Golovkın.
Qazaqstandyq jáne álemdik boks legendasy 2025 jyldan beri World Boxing-ti basqarady.