Shyǵys Qazaqstan oblysynda Zaısan kóline qatysty janjal órshidi: demalys oryndarynda qoqysty tikeleı qumǵa kómip tastaǵan. Bul jaǵdaı áleýmettik jelidegi shaǵymnan keıin jurtshylyqtyń nazaryn aýdardy, dep habarlaıdy infohub.kz saıty.
Zhaneka1408 degen qoldanýshy Threads áleýmettik jelisinde kól jaǵasyndaǵy buzýshylyqtar týraly jazba jarıalady. Onyń aıtýynsha, Baıtogas aýylynda 40-50-ge jýyq kıiz úı tigilgen, olardyń ıeleri qoqysty shyǵarýmen áýre bolmaı, jaı ǵana janyndaǵy shuńqyrlarǵa kómip tastaıdy eken. Ol ıelerdiń áreketteriniń zańdylyǵyn tekserýdi talap etti.
Shyǵys Qazaqstan oblysy polısıa departamenti bul ótinishke jaýap berdi. Quqyq qorǵaý organdary demalys aımaqtaryndaǵy abattandyrý erejelerin buzý men ortaq paıdalaný oryndaryn lastaýǵa qarsy profılaktıkalyq jumystar turaqty túrde júrgizilip jatqanyn habarlady. Jazǵy maýsym bastalǵaly atalǵan ýchaskedegi buzýshylyqtar úshin alty kıiz úı ıesi ákimshilik jaýapkershilikke tartyldy. Sonymen qatar, ýákiletti organdarǵa buzýshylyqtarǵa yqpal etetin sebepter men jaǵdaılardy joıý týraly nusqamalar jiberildi.
Shyǵys Qazaqstan oblysy ákimdiginiń baspasóz qyzmeti de jaǵdaıǵa túsinikteme berdi. «Qazınform» MAA derekterine sáıkes, tekserý barysynda aýmaqtyń sanıtarlyq jaǵdaıy baǵalanyp, buzýshylyqtar anyqtaldy. Birneshe ondaǵan adam jaýapkershilikke tartyldy. «Anyqtalǵan buzýshylyqtar boıynsha ákimshilik hattamalar toltyryldy. 26 adamǵa eskertý jasaldy, taǵy úsheýi QR "Ákimshilik quqyq buzýshylyq týraly" kodeksiniń 505-baby boıynsha aıyppul túrindegi ákimshilik jaýapkershilikke tartyldy», — dep habarlady oblys ákimdiginiń baspasóz qyzmeti.
Sonymen qatar, jaǵalaýda sanıtarlyq tazalaý jumystary uıymdastyryldy. Oǵan kásipkerler men jergilikti turǵyndar jumyldyryldy. Shuńqyrlar tazartylyp, turmystyq qaldyqtar jınalyp, shyǵaryldy, aýmaq retke keltirildi.