Japonıanyń Kúsú aralynda 7,1 baldyq kúshti jer silkinisi boldy. Zilzaladan keminde 50 adam jaraqat aldy, órtter tutanyp, ǵımarattar qırap, elektr jaryǵy birneshe jerde sónip qaldy. Bul týraly infohub.kz habarlaıdy.
Jer silkinisi seısenbi, 28 shildede Kúsú aralynyń ońtústigindegi Kýmamoto prefektýrasynda boldy. Jer asty dúmpýleriniń kúshi japondyq seısmıkalyq qarqyndylyq shkalasy boıynsha eń joǵary deńgeıge jetti. NHK telearnasynyń aıtýynsha, mundaı kúshti jer silkinisi sońǵy ret 2024 jyly Noto túbeginde tirkelgen. Al Kýmamoto prefektýrasynda osyndaı aýqymdy jer silkinisi 10 jyl buryn, 2016 jyly bolǵan edi. Sonda 275 adam qaza taýyp, 2739 adam jaralanǵan bolatyn.
Negizgi dúmpýden keıin aımaqta birneshe qaıtalama jer silkinisteri boldy, olardyń keıbireýleri japondyq shkala boıynsha besinshi deńgeıdiń tómengi shegine jetti. Aldymen Arıake jáne Iasýsıro shyǵanaqtarynyń jaǵalaýyna bıiktigi bir metrge deıin sýnamı qaýpi jarıalandy, alaıda 18:10-da jergilikti ýaqytpen Japonıa Meteorologıalyq agenttigi eskertýdi alyp tastady.
NHK derekteri boıynsha, aýrýhanalarǵa keminde 50 zardap shekken adam jetkizildi, onyń ishinde Hıkava qalasyndaǵy qarttar úıiniń on turǵyny bar. Kóptegen turǵyndar qala ákimdiginiń ǵımaratyna panalady, al evakýasıalanǵandar qalalyq mektepterge ornalastyryldy. Japonıa premer-mınıstri Sanae Takaıtı dúleı kúsh órtterge, joldar men kópirlerdiń búlinýine, ǵımarattardyń qıraýyna jáne elektr jaryǵynyń óshýine ákelgenin málimdedi.
Kyushu Electric Power energetıkalyq kompanıasy tekserýden keıin Saga prefektýrasyndaǵy «Genkaı» AES-i men Kagosıma prefektýrasyndaǵy «Sendaı» AES-iniń jumysynda eshqandaı aýytqý anyqtamady. «Atom elektr stansıalarynda normadan eshqandaı aýytqý tabylǵan joq», — dedi kompanıada.
Jer silkinisiniń saldarynan temirjol qatynasy toqtatyldy. Kyushu Railway Company kompanıasy Kúsú Sınkansen jyldam poıyzdaryn qosa alǵanda, barlyq poıyzdardyń qozǵalysyn toqtata turý týraly málimdedi. «Kúsú Sınkansen jyldam poıyzdaryn qosa, barlyq poıyzdardyń qozǵalysy ýaqytsha toqtatyldy», — delingen operatordyń habarlamasynda.
Premer-mınıstr Sanae Takaıtı adam shyǵyny men zalaldyń tolyq kólemi áli baǵalanyp jatqanyn aıtty. «Bizge zardap shekkender týraly habarlandy, — dedi ol. — Keıbir aýdandarda elektr jaryǵy óship, órtter shyǵyp, joldar men kópirler búlinip, ǵımarattar qırady».
Budan buryn Kýmamoto prefektýrasyndaǵy kúshti jer silkinisterinen keıin Aeon Mall Kumamoto saýda ortalyǵynda jarylys bolǵany habarlanǵan. Qurylystardyń qıraýynan keıin 20–30 adamnyń orny belgisiz. «Polısıa derekkózderiniń habarlaýynsha, 20–30 qyzmetkermen baılanys úzilgen. Polısıa men órt sóndirýshiler ǵımarat ishinde bireýlerdiń bógelip qalmaǵanyn anyqtaýǵa tyrysýda», — dep habarlaıdy NHK telearnasy.