Jambyl oblysynda 18 jastaǵy júkti qyz kúıeýiniń qatigezdiginen zardap shekti. Oqıǵa zıratta bolǵan, oǵan er adam áıelin eriksiz alyp kelgen. Bul fakti boıynsha polısıa qylmystyq is qozǵady, dep habarlaıdy infohub.kz saıty.
Threads áleýmettik jelisinde quqyq qorǵaýshy Lázzat Raqyshevaǵa silteme jasap habarlanǵandaı, er adamnyń ashýynyń sebebi — áıeliniń ruqsatsyz úıden shyǵýy. Agresor áıelin kúshpen kólikke otyrǵyzyp, jol boıy basynan uryp, zıratqa aparǵan.
Zıratta qorlyq jalǵasqan: er adam telefondy tekserý úshin tartyp alǵan, pyshaqpen qorqytqan, tunshyqtyryp, betinen urǵan. Qorqynysh pen soqqylardan qyzdyń sýy buzylyp, tolǵaǵy bastalǵan. Biraq bul kúıeýin toqtatpaǵan — ol ony bir saǵattan astam ýaqyt ustap, áıeliniń kóz jasy men azaby ony odan saıyn ashýlandyratynyn aıtqan.
NUR.KZ tilshisine Jambyl oblystyq polısıa departamentinde habarlaǵandaı, soqqyǵa jyǵý faktisi boıynsha qylmystyq is qozǵalǵan. Kúdikti anyqtalyp, polısıaǵa jetkizilgen. Qazirgi ýaqytta oqıǵanyń barlyq mán-jaıy anyqtalýda. Tergeý barysy Jambyl oblystyq polısıa departamenti basshylyǵynyń baqylaýynda.