Jambyl oblysynda qaza tapqan 25 jastaǵy sportshy Ahmet Dýkenbaıdyń týystary memlekettik qorǵaý berýdi ótindi. Olar óz qaýipsizdikterine alańdap, qylmysqa basqa adamdardyń qatysy bolýy múmkin ekenin tekserýdi talap etip otyr, dep habarlaıdy infohub.kz saıty.
Qaıtys bolǵan sportshynyń ápkesi Zarına Dýkenbaevanyń aıtýynsha, 1 tamyzǵa qaraǵan túni úıleriniń janynan tórt-bes oq atylǵan. Shamamen bir saǵattan keıin polısıa qyzmetkerleri otbasyna Ahmet Dýkenbaıdyń aýyr halde aýrýhanaǵa jetkizilgenin habarlaǵan. Keıin ol kóz jumǵan.
Marqumnyń jubaıy Altynaı Boranbaıdyń aıtýynsha, qastandyqtan sál buryn kúıeýi ony beıtanys adamdarmen janjal bolǵanyn eskertken. Ol balalardy muqıat qadaǵalap, alysqa jibermeýdi jáne saq bolýdy ótingen.
Sportshynyń ákesi Serik Dýkenbaıuly týystarynyń ómirine qaýip tónip turǵanyn aıtyp, otbasyna memlekettik qarýly kúzet berýdi talap etken.
Buǵan deıin er adamnyń Túrar Rysqulov aýdanynyń Lýgovoe aýylynda túngi saǵat úsh shamasynda atylyp óltirilgeni habarlanǵan bolatyn. Týystary oǵan qaýip tóngenin aıtyp, jergilikti qylmystyq toptyń qatysy bolýy múmkin ekenin jetkizgen. Atalǵan oqıǵa boıynsha polısıa sotqa deıingi tergeýdi bastap, kúdikti ustalyp, ýaqytsha ustaý ızolátoryna qamalǵan.