Arnaıy salyq rejımi boıynsha jeńildetilgen deklarasıa negizinde jumys isteıtin kásipkerlik sýbektileri aǵymdaǵy jyldyń birinshi jartyjyldyǵynyń qorytyndysy boıynsha tabysyn 9,4 trln teńgege deıin ulǵaıtty. Qarjy mınıstrliginiń habarlaýynsha, bul ótken jyldyń sáıkes kezeńimen salystyrǵanda 18,9%-ǵa kóp — ol kezde kórsetkish 7,9 trln teńge bolatyn, dep habarlaıdy infohub.kz saıty.
«Aǵymdaǵy jyldyń birinshi jartyjyldyǵynyń qorytyndysy boıynsha osy rejımdi qoldanatyn bıznestiń tabysy 9,4 trln teńgeni qurady. Ótken jyldyń sáıkes kezeńimen salystyrǵanda olar 18,9%-ǵa ósip, 7,9 trln teńgeden asty», – delingen jarıalanǵan habarlamada.
2026 jyldyń qańtarynan bastap jańa Salyq kodeksi kúshine enip, onyń aıasynda arnaıy salyq rejımderi ońtaılandyryldy. Olardyń ishinde eń suranysqa ıesi — jeńildetilgen deklarasıa negizindegi arnaıy salyq rejımi. Ony qoldanýdyń alǵashqy qorytyndylary kásipkerler qyzmetiniń negizgi kórsetkishterinde oń dınamıka baıqalyp otyrǵanyn kórsetedi, dep atap ótti Qarjy mınıstrliginde.
Jeńildetilgen arnaıy salyq rejımin qoldanatyn kásipkerlerdiń jumyspen qamtý kórsetkishteri de oń dınamıka kórsetip otyr. Atap aıtqanda, jaldamaly qyzmetkerler sany 14,2%-ǵa artyp, 445 myńnan 509 myń adamǵa jetti, al eńbekaqy tóleý qory 7,2%-ǵa ósti.
Sonymen qatar vedomstvonyń málimetinshe, jaldamaly qyzmetkeri joq bıznes sýbektileriniń sany 30,5%-ǵa qysqardy. Deklarasıalarynda nólden 5 mln teńgege deıingi tabysty kórsetken kásipkerlerdiń sany da úshten birge jýyq azaıdy.
Jeńildetilgen deklarasıa negizindegi arnaıy salyq rejımin Salyq kodeksinde belgilengen talaptarǵa saı keletin, jyldyq tabysy 600 myń aılyq eseptik kórsetkishke deıingi jeke kásipkerler men zańdy tulǵalar qoldana alady. 2026 jylǵa arnalǵan aılyq eseptik kórsetkish 4325 teńgeni quraıdy, ıaǵnı 600 AEK – 2,595 mlrd teńge.
Jeńildetilgen arnaıy salyq rejımi boıynsha jeke nemese korporatıvtik tabys salyǵynyń mólsherlemesi 4%-dy quraıdy. Bul rette jergilikti ókildi organdar (máslıhattar) onyń mólsherin 50%-ǵa azaıtýǵa nemese ulǵaıtýǵa quqyly, ıaǵnı naqty salyq mólsherlemesi tabystyń 2%-dan 6%-ǵa deıingi aralyǵynda bolýy múmkin.
Osy rejımdi qoldanatyn kásipkerler áleýmettik salyq pen qosylǵan qun salyǵyn tóleýshiler bolyp sanalmaıdy, ımporttalatyn taýarlarǵa qosylǵan qun salyǵy men rezıdent emes úshin qosylǵan qun salyǵy buǵan jatpaıdy.