Sándi joǵary aqýyzdy dıetalar bárine birdeı jaraı bermeıdi. 350-den astam zertteýdi qamtyǵan jańa ǵylymı sholý kórsetkendeı, az qozǵalatyn adamdar úshin úsh amınqyshqyldy shamaly shekteý rasıondaǵy artyq aqýyzǵa qaraǵanda kóbirek paıda ákelýi múmkin, dep habarlaıdy infohub.kz.
Ǵalymdardyń aıtýynsha, az qozǵalatyn kóptegen eresek adamdar aǵzaǵa qajetinen artyq aqýyz tutynady. Olardyń pikirinshe, artyq aqýyz árqashan qosymsha paıda ákele bermeıdi, al keı jaǵdaıda ony shamaly shekteý aǵzanyń qorǵanys mehanızmderin iske qosýy múmkin.
Sholýǵa sáıkes, aqýyz tutynýdy azaıtý zat almasýdy jaqsartýmen, jasýshalardyń zaqymdanýyn azaıtýmen jáne jasýshaishilik «jóndeý» prosesterin belsendirýmen baılanysty. Sonymen qatar, ınsýlınge sezimtaldyqtyń jaqsarýymen, energıa shyǵynynyń artýymen jáne qabynýdyń tómendeýimen baılanystyrylatyn FGF21 gormonynyń deńgeıi de joǵarylaıdy.
Avtorlardyń pikirinshe, sheshýshi róldi aqýyzdyń jalpy mólsheri emes, jekelegen amınqyshqyldardyń quramy atqarýy múmkin. Olar ásirese úsh mańyzdy amınqyshqylǵa — metıonınge, ızoleısınge jáne valınge nazar aýdarady. Bular barlyq aqýyzdy ónimderde kezdesedi, biraq eń kóbi — et pen balyqta. Kóptegen eksperımentterde dál osylardy shekteý aqýyzdy jalpy tutynýdy azaıtqanda baıqalatyn paıdaly áserlerdiń edáýir bóligin qaıtalady.
Degenmen, zertteýshiler nátıjelerdi ázirge barlyǵyna aqýyzdy azaıtýǵa keńes retinde qabyldaýǵa bolmaıtynyn eskertedi. Derekterdiń kópshiligi janýarlarǵa júrgizilgen eksperımentterden alynǵan. Adamdarda zat almasýǵa áseri týraly derekter bar, biraq aqýyzdy nemese jeke amınqyshqyldardy shekteý ómirdi uzartatyny týraly naqty dálelder ázirge joq.
Sonymen qatar, aqýyz kóptegen adamdar úshin mańyzdy bolyp qala beredi. Sportshylarǵa, egde jastaǵy adamdarǵa, júkti áıelderge jáne keıbir naýqastarǵa bulshyqet massasyn saqtaý jáne aǵzanyń qalypty jumysy úshin aqýyzdy kóbirek tutyný qajet.
Aqýyz tutyný boıynsha usynystar jeke bolýy kerek jáne jas ereksheligin, fızıkalyq belsendilik deńgeıin jáne densaýlyq jaǵdaıyn eskerýi tıis. Mamanmen keńespeı, óz betinshe tómen aqýyzdy dıetaǵa kóshýge bolmaıdy, ásirese sozylmaly aýrýlar nemese turaqty kúsh jattyǵýlary bolsa.