Áleýmettik jelilerde erekshe qyzmet tanymal bolyp keledi: paıdalanýshylar óz súıikti janýarlarynyń esteligin almazǵa aınaldyra alady. Bul – Jerdegi eń qatty materıal, dep habarlaıdy infohub.kz.
Kompanıa úı janýarlarynyń júninen, qaýyrsynynan nemese kúlinen almaz sıntezdeıdi. Osylaısha ıt, mysyq, qus, teńiz shoshqasy, qoıan nemese homák sekildi janýarlardy máńgilikke saqtaýǵa bolady. Sonymen qatar, adam shashynan da asyl tas jasaýǵa bolady.
Kompanıanyń túsindirýinshe, jún men shash quramynda keratın qurylymynda shamamen 49% kómirtegi bar. Al almaz – taza kómirtegi. Ony barlyq qospalardan jer qoınaýyndaǵyǵa uqsas jaǵdaılarda tazartady.
«Odan keıin osy kómirtegiden grafıt dıskisin jasaımyz, ol HPHT-preske (joǵary qysym, joǵary temperatýra) salynady, onda shamamen 1400°C temperatýrada jáne 50–60 myń atmosfera qysymynda kómirtegi almazǵa krıstaldanady», – dep túsindirdi ıdeıa avtorlary.
Sodan keıin tasty qyrlap, mysaly, súıikti ıtiniń júninen jasalǵan gaýhar saqınasyna qoldanýǵa bolady. Mundaı almazdy alý úshin bar bolǵany 5 gram jún jetkilikti. Sıntezden keıin tasty ár túrli túske boıaýǵa nemese móldir kúıinde qaldyrýǵa bolady.
Qyzmet quny 0,5 karat (0,1 g) salmaqtaǵy gaýhar úshin 900 myń teńgeden bastalady. Kompanıanyń keńsesi Máskeýde, al zerthanasy Belarýste ornalasqan. Klıentterge poshta arqyly materıal jınaý jınaǵy jiberiledi, onyń ishinde pınset, qasyq, dorba, shashqa arnalǵan konteıner, nusqaýlyq jáne sırkonıden jasalǵan gaýhar maketteri bar.
Buǵan deıin Almatyda úı janýarlaryna arnalǵan kolýmbarı salý josparlanǵany málim boldy.