Jańa Gvıneıanyń ormandarynan ýly emes jylannyń jańa túri tabylyp, oǵan Guns N' Roses tobynyń gıtarısi Sleshtiń qurmetine at qoıyldy. Bul jańalyq kóp jylǵy zertteýlerdiń nátıjesinde ashyldy, dep habarlaıdy infohub.kz.
Jylan 2006 jyly túngi ekspedısıa kezinde tabylǵan bolatyn. Gerpetolog Krıs Ostın úlken aǵashtyń túbinen beıtanys daraqty baıqaǵan, alaıda ol kezde ǵalymdar bul jeke túr ekenin boljamaǵan.
2026 jyly amerıkandyq zertteýshiler syrtqy belgilerine salystyrmaly taldaý jasap, genetıkalyq test júrgizdi. Lielaphis slashi týystas túrlerden tek qabyrshaq sanymen ǵana emes, genetıkalyq turǵydan da erekshelenetini anyqtaldy. Sonymen qatar, olardyń mekendeıtin ortasynda da aıyrmashylyqtar bar ekeni belgili boldy.
Jańa túrdiń uzyndyǵy shamamen 71 santımetrge jetedi, túsi qyzǵylt-qońyr. Jylan ýly emes jáne adamǵa qaýipsiz. Bul tuqymnyń ókilderi túngi tirshilik júrgizip, úlken aǵashtardyń túbinde ań aýlaıdy.
Lielaphis slashi ataýy zertteý avtorlarynyń biri, gerpetolog Sara Rýannyń arqasynda paıda boldy. Ol bala kezinen Guns N' Roses tobyn jaqsy kórgen, sol ýaqytta onyń baýyrymen jorǵalaýshylarǵa degen qyzyǵýshylyǵy da oıanǵan.
Rýan 12 jasynda Reptiles Magazine jýrnalynyń muqabasynan Sleshti kórgen: mýzykant qolynda óziniń torly pıtonyn ustap turǵan. Keıin bul fotosýret ǵalymnyń jańa túrge at tańdaǵan kezde esine túsken.
Rýannyń aıtýynsha, Slesh murajaılarǵa, haıýanattar baǵyna jáne tabıǵat tarıhyna degen súıispenshiligi týraly jıi aıtatyn, sondaı-aq bala kezinde kóshede jylan izdegendi unatatynyn da aıtqan. Bul qyzyǵýshylyqtar zertteýshige jaqyn bolyp shyqqandyqtan, ol gıtarıstiń esimin túr ataýynda máńgilikke qaldyrýdy jón kórgen.
Sleshtiń ózi mundaı qurmet ol úshin kútpegen jaǵdaı bolǵanyn moıyndady. «Baýyrymen jorǵalaýshylardy uzaq ýaqyt jaqsy kóretin adam retinde, men óte rızamyn jáne qatty tolqyp turmyn. Bul óte keremet, men mundaı sáttiń keletinin eshqashan oılamappyn», — dedi mýzykant.
Ǵalymdar Lielaphis slashi týraly ázirge az biledi. Túngi jylandar jaqsy jasyrynady, al Jańa Gvıneıanyń ormandary áli de jetkilikti zerttelmegen. Aral orasan zor bıoalýantúrliligimen erekshelenedi, biraq onyń ekojúıelerine aýyl sharýashylyǵy men paıdaly qazbalardy óndirý qaýip tóndirýde.