InfoHub Logo

Актриса Айгүл Иманбаева 22 жасында алғашқы некесін бұзып, алты-жеті айлық сәбиімен анасының үйіне оралғандағы қиындықтарды жасырмай айтты. Бұл жағдай оның өмірге деген көзқарасын түбегейлі өзгерткенін мойындады.

Бұл туралы Infohub.kz ақпарат агенттігі хабарлайды.

Тұрмыстық қиындықтар мен намыс

Актрисаның айтуынша, балалық шағында отбасында ешқандай материалдық қиындық болмаған. Анасы бухгалтер болып жұмыс істеп, отбасын асыраған. Алайда, 90-жылдардағы қиын кезеңде кәмпиттің өзін үлестіріп жегенін еске алды. Алғашқы некесінің үзілуі оның өміріндегі ең үлкен сынақ болды.

«Намыс мені өлтірді. «Мына Гүлсімнің қызы ажырасып келіпті. Қолындағы баласымен келіпті» деген сөздерді естімеу үшін Алматыға келіп, төрт-бес жерде жұмыс істедім. Жоқтықты да сол кезде көрдім», - дейді Иманбаева.

Өмір сабағы

Айгүл Иманбаева сол кездегі қиындықтарды өз күшімен еңсеруге тырысқанын айтты. Бірнеше жерде қатар жұмыс істеу оған жауапкершілікті сезінуге, бар мен жоқтың қадірін түсінуге үйреткен. Актриса бұл тәжірибені өміріне үлкен сабақ болғанын атап өтті.

«Адаспаймын деп жүріп адастым, бірақ сол адасу арқылы өз жолымды таптым. Қиындықты жеңдім. Аштық пен тоқтықтың, баршылық пен жоқшылықтың қадірін сол кезде ғана ұқтым», - деп ойын қорытындылады ол.

Айгүл Иманбаева кім?

Айгүл Серікқұлқызы Иманбаева – 1977 жылы 15 наурызда Жамбыл облысында дүниеге келген қазақстандық әнші, актриса, продюсер. Темірбек Жүргенов атындағы өнер академиясын бітірген. Ғабит Мүсірепов атындағы академиялық театрдың актрисасы, «Хабар» арнасындағы «Ұят болмасын» бағдарламасының жүргізушісі ретінде танымал. Кино саласында да белсенділік танытып, бірнеше фильмде басты рөлдерді сомдаған. 2006 жылы «Дарын» мемлекеттік жастар сыйлығының лауреаты, 2011 жылы жеке «А.И» драма театрын ашқан. Қазақстанның еңбек сіңірген қайраткері.