InfoHub Logo

Әлемдік мұнай қоры рекордтық жылдамдықпен таусылуда. Бұл жағдай АҚШ пен Израидің Иранға қарсы жүргізіп жатқан соғысымен байланысты. Блумберг агенттігінің жазуынша, бұл шиеленіс Парсы шығанағынан келетін отын жеткізілімін қиындатып, әлемдік нарықты энергия тапшылығына ұшырату қаупін арттыруда.

Бұл туралы Infohub.kz ақпарат агенттігі хабарлайды.

Агенттік мәліметі бойынша, мұнай қорының тез азаюы бағаның күрт өсуіне және тапшылыққа әкелуі мүмкін. Осыдан екі ай бұрын Ормуз бұғазының іс жүзінде жабылуынан кейін миллиардтан астам баррель мұнай жеткізілімінен айырылған жағдайда, үкіметтер мен өнеркәсіптердің бұл жағдайды жұмсартуға мүмкіндіктері азаяды.

Нарықтың осалдығы

Блумбергтің жазуынша, қорлардың күрт азаюы, тіпті жанжал аяқталғаннан кейін де нарықтың болашақ үзілістерге осал болып қалатынын білдіреді. Morgan Stanley сарапшыларының бағалауы бойынша, 1 наурыз бен 25 сәуір аралығында әлемдік мұнай қоры күніне шамамен 4,8 миллион баррельге азайған.

Азия елдеріндегі жағдай

Жалпы әлемдік мұнай қоры 2018 жылдан бергі ең төменгі деңгейге жақындап келеді. Ең күрделі жағдай отын импортына тәуелді бірнеше Азия елдерінде байқалады. Атап айтқанда, Индонезия, Вьетнам, Пәкістан және Филиппин сияқты елдерде қорлар бір айдан кейін-ақ қауіпті деңгейге жетуі мүмкін.

Еуропаның авиациялық отыны

Еуропада авиациялық отын қоры да тез таусылуда. Демалыс маусымы алдында тұрғандықтан, кейбір сарапшылар маусым айында бұл қорлардың да қауіпті деңгейге жетуі ықтимал деп болжап отыр.

Ормуз бұғазының рөлі

Егер Ормуз бұғазы арқылы мұнай жеткізілімі қайта жандандырылмаса, қыркүйек айына қарай әлемдік мұнай қоры мұнай құбырларының, резервуарлардың және экспорттық терминалдардың қалыпты жұмыс істеуі үшін қажетті ең төменгі деңгейге жетеді. Бұл «операциялық минимум» деп аталады.