InfoHub Logo

Алматы қаласындағы шағын қабатты үйлердің тұрғындары жергілікті биліктің даму деген желеумен құрылыс компанияларының мүддесін көздеп отырғанын айтып, наразылық білдіруде. Олар өз аудандарын жоспарлы түрде бұзып, тұрғындарды көшіруге жол бермейтіндерін мәлімдеді.

Бұл туралы Infohub.kz ақпарат агенттігі хабарлайды.

Қаланың «органикалық тіні» жойылуда

Соңғы кездері Алматыда қаланың жаңартылған Бас жоспарына байланысты тұрғындар арасында наразылық күшейіп отыр. Жоспар бойынша, бірқатар шағын қабатты аудандар (жеке сектор, жеке тұрғын үй құрылысы аймағы) көпқабатты үйлер салуға арналған аймаққа айналдырылуда. Сонымен қатар, жеке сектордағы кейбір жер учаскелері мемлекеттік қажеттіліктер үшін (жол айрықтарын салу немесе жолдарды кеңейту, әлеуметтік нысандар мен инфрақұрылымдарды салу) мәжбүрлеп алынуы тиіс.

Бұл өзгерістерге байланысты Тастақ, Қайрат, Маяк, Алмас, Теректі, Өжет, Мәдениет сияқты бірқатар шағын аудандар мен Наурызбай ауданындағы Қалқаман, Мейрам, Жайлы сияқты аудандардағы үйлер немесе олардың бір бөлігі көпқабатты құрылыс аймағына енгізілді немесе мемлекеттік қажеттілікке алынуы мүмкін.

Тұрғындардың талабы – Бас жоспарды қайта қарау

Наурызбай ауданының Қалқаман тұрғындары жиналып, қала әкіміне, үкіметке және президентке Бас жоспарды қайта қарап, өз аудандарын көпқабатты құрылыс аймағынан шығарып, жеке тұрғын үй құрылысы аймағы ретінде қалдыру туралы талап қойды.

Шамамен 150 адам қатысқан кездесу өте эмоционалды өтті. Тұрғындар қала билігінің келісімінсіз аудандарын көпқабатты құрылыс аймағына айналдырғанына ашулы болды.

Билік өкілдерінің жауабы

Сәулет басқармасы мен Бас жоспарды әзірлеушілер қаланың дамып, өсіп жатқанын, басқа өңірлерден келетін тұрғындарды орналастыру қажеттігін алға тартты. Олар ірі, қарқынды дамып жатқан мегаполисте жеке тұрғын үй құрылысын сақтап қалу тиімсіз екенін, бұл қазіргі заманғы қала құрылысының талаптарына сай келмейтінін айтты. Сондай-ақ, Бас жоспар мен ауданның егжей-тегжейлі жоспарлау жобасы (ЖЖЖ) әзірленіп, қоғамдық тыңдаулардан өтіп, бекітілгенін, оны тек сот арқылы ғана өзгертуге болатынын жеткізді.

Әкімдік өкілдері көпқабатты құрылысқа ауыстыру міндетті түрде үйлерді бұзу дегенді білдірмейтінін, инвестор немесе құрылыс салушы табылып, меншік иелерімен келісімге келген жағдайда ғана бұл жүзеге асатынын айтып, тұрғындарды сабырға шақыруға тырысты.

Тұрғындардың жауабы

Алайда, бұл жауаптар тұрғындарды қанағаттандырмады, керісінше, олардың ашуын одан әрі күшейтті. Олар учаскелерді сатып алғанда, үйлер салып, ағаштар отырғызғанда ешкім олардың бұзылатынын айтпағанын, сондықтан ұрпақтарына қалатын мекен ретінде капиталымен салынғанын жеткізді.

Тұрғындардың пікірінше, билік өкілдері қаланың өсуіне жаңа жер қажет деген сылтаумен алдын ала дайындалған формальды жауаптарды ғана айтты. Олар ауданның жақын арада метро желісінің келуіне байланысты ірі құрылыс компанияларының назарына іліккенін, бұл жерде көпқабатты тұрғын үйлер салу және пәтерлерді сату өте тиімді болатынын болжап отыр.

Сонымен қатар, олардың ауданына жапсарлас коттедж қалашығына ешқандай өзгеріс енгізілмегенін атап өтті. Бұдан олар қала құрылысы саясатының құрылыс магнаттарының мүддесіне сай жүргізіліп отырғанына көздері жеткенін айтты.

Тұрғындардың айтуынша, қаланың дамуы – бұл шағын қабатты аудандарды бұзып, тұрғындарды қуып шығып, жаңа тұрғын үй кешендерін салу емес, керісінше, онда тұратын адамдардың мүддесін қамтамасыз етіп, жайлы жағдай жасау. Олар қаладағы экологиялық жағдайдың өзі ауыр екенін, көпқабатты үйлердің құрылысы мен халықтың және көлік ағынының көбеюі бұл жағдайды одан әрі нашарлататынын айтты. Қаланы жүктемеден босатып, жаңа тұрғындардың келуін шектеп, облыс орталықтарын дамыту қажет деп санайды.

Сондықтан олардың басты талабы – өз аудандарын Бас жоспарда жеке тұрғын үй құрылысы аймағы ретінде белгілеу. Өйткені, мемлекет мәжбүрлеп көшірмесе де, бұл жерді алған құрылыс компаниясы меншік иелеріне қысым жасап, ақыры өз дегеніне жететініне сенімді.