InfoHub Logo

Алматыдағы Аль-Фараби даңғылында болған қайғылы жол апатынан кейін үш қылмыстық іс қозғалды. Бұл оқиға қазақстандықтардың назарын аударып, тергеу барысы қызу талқыланып жатыр.

Бұл туралы Infohub.kz ақпарат агенттігі хабарлайды.

Смертельный наезд – от 7 до 10 лет колонии

Алғашқы қылмыстық іс үш адамның өмірін қиған жол апатына қатысты қозғалды. Күдікті П.-ға алкогольдік масаң күйде жол ережесін бұзып, салдарынан екі немесе одан да көп адамның өліміне себепкер болды деген айып тағылуда. Бұл бап бойынша кінәлі деп танылғандар 7 жылдан 10 жылға дейін бас бостандығынан айырылуы мүмкін. Сотқа дейінгі тергеу аяқталып, іс сотқа жолданды. Алматы қаласының қылмыстық істер жөніндегі мамандандырылған ауданаралық сотында 28 мамыр күні сағат 15:00-де алдын ала тыңдаулар өтеді.

Қызметтік әрекетсіздік – 7 жылға дейін бас бостандығынан айыру немесе шектеу

Екінші қылмыстық іс Алматы қалалық полиция департаменті басшыларының бірінің көлік жүргізушісі болған полиция қызметкеріне қатысты қозғалды. Ол қызметтік әрекетсіздік танытып, ауыр салдарға әкеп соқтырды деп айыпталуда. Бұл бап бойынша жаза 7 жылға дейін бас бостандығынан айыру немесе шектеу түрінде болуы мүмкін. Ішкі істер министрлігінің хабарлауынша, бұл іс бойынша тергеу аяқталуға жақын және жақын арада сотқа жіберіледі.

Қызметін асыра пайдалану – 3 жылға дейін бас бостандығынан айыру немесе шектеу

Үшінші қылмыстық іс мемлекеттік нөмірлерді заңсыз беру мүмкіндігіне қатысты тергелуде. Қалалық прокуратураның мәліметінше, бұл іс Қылмыстық кодекстің «Қызметін асыра пайдалану немесе лауазымдық өкілеттігін асыра сілтеу» бабы бойынша тергелуде. Бұл бап бойынша айыппұлдан бастап 3 жылға дейін бас бостандығынан айыру жазасы қарастырылған. Қазіргі уақытта кінәлі тұлғалар анықталуда.

Жол апатының хронологиясы

21 наурызға қараған түні Аль-Фараби даңғылы мен Мендіқұлов көшесінің қиылысында Zeekr автокөлігі қарсы жолаққа шығып, Mercedes көлігімен соқтығысқан. Апат салдарынан Mercedes көлігінің 29 жастағы жүргізушісі мен 20 және 22 жастағы екі жолаушысы оқиға орнында көз жұмды. Zeekr автокөлігінің жүргізушісі жарақат алған. Кейіннен оның алкогольдік масаң күйде болғаны анықталды. Оған қатысты жол ережесін бұзу туралы қылмыстық іс қозғалды.

Әлеуметтік желілерде апатқа полиция қызметкерінің қатысы бар деген болжамдар пайда болды. Бұл мәліметтер бойынша тексерулер жүргізіліп, бірқатар полиция қызметкерлері қызметінен босатылды.