tengrinews.kz
Алматыда ірі көлемдегі сел жүрді: Зардап шеккендер жоқ
Алматы қаласының Бостандық ауданында 16 сәуір күні кешкісін ірі көлемдегі сел жүрді. Бұл туралы Infohub.kz ақпарат агенттігі хабарлайды.
Оқиға «Ремизовка» бау-бақша серіктестігі аумағында болған. Төтенше жағдайлар департаментіне хабар түскеннен кейін, құтқарушылар мен мамандар дереу оқиға орнына аттанды. Тексеру барысында қатты жауын салдарынан топырақтың шамадан тыс ылғалданып, шамамен 300 текше метр көлемдегі топырақ массасының жылжығаны анықталды.
Селдің салдары
Сел салдарынан бірнеше үйдің шатыры зақымдалды. Абырой болғанда, адам шығыны тіркелген жоқ. Оқиға орнындағы жұмыстарға 40-қа жуық адам мен 10 бірлік техника жұмылдырылды. Қазіргі уақытта жағдайды комиссиялық тексеру жалғасып, аумақта ТЖД және полиция қызметкерлері кезекшілік атқаруда.
ТЖД ұсыныстары
Алматы қаласының ТЖД сел қаупін алдын алу мақсатында тұрғындарға бірқатар ұсыныс жасады. Олардың қатарында септиктер мен шұңқырларды дұрыс пайдалану, су құбырлары мен дренаждық жүйелердің жағдайын бақылау, сондай-ақ аумақта судың жиналуына жол бермеу және жауын-шашын суын уақытылы бұру жұмыстарын жүргізу бар. Бұл шаралар топырақ жылжуының алдын алуға және төтенше жағдайлардың туындау қаупін азайтуға көмектеседі.
-
Қордың бұрынғы басшысы Галымжан Әбілов және жеке клиника директоры жалған медициналық қызметтер көрсеткені үшін кінәлі деп танылды.
-
Әлеуметтік желіде жеке өміріне қатысты бейнематериалдар тарап, көпшіліктің талқысына түскен асаба Хан жұбайымен бірге алғаш рет пікір білдіріп, қуанышты жаңалығымен бөлісті.
