InfoHub Logo

Алматыда 31 жастағы, жетінші айдағы жүкті Анна Ефеменконың өліміне байланысты туыстары бірнеше медициналық мекемеде дәрігерлердің немқұрайлылығы болуы мүмкін деген күдігін алға тартты.

Бұл туралы Infohub.kz ақпарат агенттігі хабарлайды.

Туыстарының айтуынша

Отбасының мәліметінше, жүкті әйелге уақтылы тиісті көмек көрсетілмеген. Салдарынан ол және сәбиі қайтыс болды.

Жақындарының айтуынша, қайғылы оқиға 4-5 мамыр аралығындағы түнде болған. Анна үйде есінен танып қалған соң, ГРЭС ықшам ауданындағы ауруханаға жеткізілген.

Туыстарының сөзінше, емдеу мекемесінде оның талдаулары шатастырылып, шұғыл көмектің орнына қарапайым тамшылатып дәрі беруді ұсынған. Осыдан кейін отбасы әйелді Алматыдағы №4 перзентханаға өз беттерімен апаруға шешім қабылдаған.

Қайтыс болған әйелдің жақындарының айтуынша, перзентханада бірнеше сағат бойы пациентке тексерулер жүргізіліп, талдаулар алынып, УДЗ жасалған. Бұл уақытта дәрігерлер бейнебайланыс арқылы әріптестерімен кеңесіп отырған.

«Олар шұғыл көмектің орнына, бірнеше сағат бойы талдаулар алып, УДЗ жасап, күйеуінің көзінше бейнебайланыс арқылы дәрігермен кеңесіп: «Не істеу керек?» деп сұрады», - делінген отбасының мәлімдемесінде.

Отбасының пікірінше, осы уақытта әйелдің жағдайы нашарлаған. Олардың айтуынша, тек таңғы сағат сегіз шамасында пациент №2 перзентханаға ауыстырылған.

Отбасының мәліметінше, сол жерде дәрігерлер әйел мен сәбидің өмірін құтқару үшін шұғыл шаралар қолдана бастаған. Аннаға жеделдетілген кесар тілігі жасалған, алайда нәрестені құтқару мүмкін болмады. Туыстарының айтуынша, бұған қатты ішкі қан кету себеп болған.

Кейін әйел комаға түскен. Бірнеше сағаттық операция мен реанимация шараларына қарамастан, 7 мамырда Анна Ефеменко сағат 00:32-де қайтыс болды.

Қайтыс болған әйелдің туыстары мұқият тергеу жүргізіп, жоғалған уақыт пен медиктердің әрекеттері үшін кім жауапты екенін анықтауды талап етеді.

Алматы Қоғамдық денсаулық сақтау басқармасының жауабы

Алматы Қоғамдық денсаусақтау басқармасының өкілдері пациенттің қайтыс болғанын растады. Алайда, дәрігерлерге қатысты айыптаулардың әзірге негізсіз екенін атап өтті.

Ведомствоның хабарлауынша, пациентке барлық қажетті медициналық көмек көрсетілген, ал қорытынды тек сот-медициналық сараптамадан кейін жасалады.

Алматы ҚДБ баспасөз қызметінің мәліметінше, әйел қаланың емханаларының біріне өз бетінше медициналық көмекке жүгінген. Онда қажетті зертханалық және аспаптық тексерулер, мамандардың қабылдауы жүргізіліп, одан әрі емдеу тактикасы анықталған.

«Диагнозы, жүктілік мерзімі және үшінші деңгейлі мамандандырылған медициналық көмек көрсету қажеттілігі ескеріліп, пациентті жедел жәрдем көлігімен қалалық перинаталдық орталыққа ауыстыру туралы шешім қабылданды», - деп хабарлады Алматы ҚДБ өкілдері.

Басқарманың хабарлауынша, перинаталдық орталыққа түскеннен кейін дереу дәрігерлер консилиумі, шұғыл емдеу-диагностикалық шаралар жүргізіліп, мамандандырылған көмек көрсетілген.

«Өкінішке орай, жүргізілген реанимациялық, хирургиялық және қарқынды емдеу шараларына қарамастан, пациент пен сәбиді құтқару мүмкін болмады», - деп атап өтті ведомство.

Сондай-ақ, ҚДБ өкілдері әлеуметтік желілерде таратылып жатқан айыптаулар ресми тексеру аяқталмайынша объективті болып саналмайтынын баса айтты.

Қазіргі уақытта сот-медициналық сараптама тағайындалды. Оның қорытындысы бойынша өлімнің нақты себебі, оқиғаның клиникалық мән-жайлары анықталып, көмек көрсетуге қатысушылардың барлығының әрекеттеріне құқықтық және медициналық баға беріледі.

Басқарма сондай-ақ, диагноз, пациенттің жағдайы және емдеу туралы ақпараттың дәрігерлік құпияға жататынын және жариялауға жатпайтынын еске салды.