АҚШ визасын ала алмаған түркістандық азамат Астанада алаяқтың құрбаны болды,деп хабарлайды Infohub.kz тілшісі.

АҚШ-қа баруды армандаған 31 жастағы түркістандық Ғалымжан Дайрабаев виза алу үшін 2,5 миллион теңгеден астам қаражатын Астана тұрғынына берген, алайда соңында алданып қалған. Ол істің белгісіз себептермен жабылып қалғанына және құқық қорғау органдарының әрекетсіздігіне наразы.

Үш рет визаға құжат тапсырып, нәтиже болмаған

Ғалымжан бұған дейін Оңтүстік Кореяда жұмыс істеген, кейін екі жылдан соң Қазақстанға оралған. АҚШ-қа виза алуға деген құлшынысы Геннадий Головкиннің жекпе-жегін көру мақсатынан туған.

Алайда ол үш рет құжат тапсырса да, әртүрлі себептермен визадан бас тартылған:

1. Бірінші әрекеті: Ол Кореядағы табысын қолданыста болмаған картасына аударған, сондықтан банктік есепшоттағы күмәнді қозғалыс салдарынан виза берілмеген.
2. Екінші әрекеті: Туристік агенттік "үйленген" деп көрсетсе, виза алу оңайырақ болады деп кеңес берген, бірақ бұл тәсіл де нәтиже бермеген.
3. Үшінші әрекеті: Барлық ақпаратты шындыққа сай көрсетіп тапсырған, бірақ тағы да сәтсіздікке ұшыраған.

"Елшілікте таныстарым бар" деген әйелге 2,5 млн теңге берген

Ғалымжанға Астанада тұратын әпкесі косметолог болып жұмыс істейтін бір әйелдің визаны рәсімдеуге көмектесе алатынын айтқан. Косметолог өзін тәжірибелі маман ретінде таныстырып, елшілікте таныстары бар екенін, тіпті Кореядағы депортация тізімінен шығарып бере алатынын уәде еткен.

Бұл қызметтері үшін ол Ғалымжаннан 5 430 доллар (2,5 млн теңгеден астам) талап еткен. Ақшаны алған соң, бір жарым ай ішінде құжаттың дайын болатынын айтқан. Бірақ бірнеше ай өтсе де, нәтиже болмаған.

Алаяқтың кінәсі дәлелденсе де, іс жабылды

Ғалымжан 2024 жылдың наурызынан бері визасын күтіп жүрген. Нәтиже болмаған соң, Астана қаласы Есіл аудандық прокуратурасына арызданған.

Тергеу барысында:

• Косметолог бастапқыда кінәсін мойындамаған, бірақ ақша аударымдары мен хабарламалар көрсетілген соң, Ғалымжаннан қаражат алғанын растаған.
• Алаяқ әйел ақшаны қайтара алмайтынын мәлімдеген.
• Прокуратура бастапқыда істің алаяқтық екенін айтқан, бірақ кейін белгісіз себептермен қылмыстық іс жабылған.

Ғалымжан іс алаяқ әйелдің "таныстарының" көмегімен жабылып тасталды ма деп қауіптенеді.

Құқық қорғау органдары жауап беруден бас тартты

Stan.kz тілшісі істің қазіргі жағдайын білу үшін Астана қаласы Есіл аудандық полиция департаментіне сұрау жолдады. Алайда полиция:

• Тергеу деректері жария етілмейтінін,
• Егер бұл тергеу мүддесіне қайшы келмесе ғана ақпарат берілуі мүмкін екенін,
• Істің не себепті жабылғаны туралы нақты жауап бере алмайтындарын айтты.

Осы мәлені қозғап,біздің де тілшілер жауаптыларға сауал жолдады,алайда олар релакцияға мардымды жауап қайтармады.

Ғалымжан заңды құқықтарының тапталуына наразы. Ол қолында барлық дәлелдер бола тұра, әділдікке қол жеткізе алмауын түсіне алмайды.

Бұл оқиға Қазақстанда алаяқтық әрекеттердің көбейіп, құқық қорғау органдарының тиісті шара қолданбауы туралы сұрақтарды қайта көтеріп отыр. Кінәсі дәлелденген адам жауапкершіліктен құтылып кете ала ма? Қазақстандық құқық қорғау жүйесі алаяқтық әрекеттердің алдын алуда қаншалықты тиімді? Бұл сұрақтар қоғамда өзекті болып қала бермек.