InfoHub Logo

Қазақстанда тауарлық газдің көтерме бағасы 1 шілдеден бастап 33% өсетіні туралы хабарлама елдегі газ бағасының өсуіне қатысты алаңдаушылықты тудырды. Бірақ, мұнай-газ саласының сарапшысы Олжас Байділдинов бұл жағдайдың мән-жайын түсіндіріп, алдағы уақытта бағаның одан әрі өсетінін айтты.

Бұл туралы Infohub.kz ақпарат агенттігі хабарлайды.

Сарапшының айтуынша, Қазақстандағы газ бағасы көп жылдар бойы шығынды болған. Елімізде өндірілетін газдің шамамен 85%-ы Қарашығанақ, Теңіз және Қашаған сияқты ірі кен орындарына тиесілі. Бұл кен орындарынан алынған тазартылған газді «QazaqGaz» компаниясы шамамен 50-55 долларға сатса, ұлттық оператор оны өздерінің еншілес компаниясы «QazaqGaz Аймақ»-қа 20-22 долларға береді екен. Бұл халыққа арзан бағамен газ жеткізу үшін жасалған.

Саланың жылдық шығыны

Олжас Байділдиновтің есептеуінше, «әлеуметтік» бағаны ұстап тұру үшін сатылымнан көретін жылдық шығын 400-500 миллион долларға жетеді. Бұған дейін бұл шығындарды газ экспорты мен транзиті арқылы өтеуге болатын еді. Алайда, ішкі тұтынудың өсуіне байланысты экспорт қысқарып, Қазақстан Ресейден жылына шамамен 5 миллиард текше метр газ импорттай бастады.

Бағаны көтеру қажеттілігі

Сарапшы 2023 жылы-ақ ұлттық компаниялардың үш жыл ішінде көтерме бағаны екі есеге арттыру жоспарын бекіткенін атап өтті. Бірақ, Байділдиновтің пікірінше, бұл да саланың шығынын жабуға жеткіліксіз. Оның айтуынша, бағаны бірден үш есеге көтеру қажет болған.

«Арзан энергия тасымалдаушылар дәуірі Қазақстанда аяқталды», - деді сарапшы.

Дегенмен, көтерме бағаның өсуі бөлшек сауда бағасының бірден 33% артатынын білдірмейді. Халық бағаның өсімін қысқы жылыту маусымында, яғни қараша-желтоқсан айларында сезінетін болады.