InfoHub Logo

Астанадағы "Нұрлы жол" теміржол вокзалындағы дәретханалардың күйі қоғамда резонанс тудырды. Әлеуметтік желіде жарияланған суреттер мен пікірлерде санитарлық тораптардың тиісті деңгейде тазаланбайтыны айтылған.

Бұл туралы Infohub.kz ақпарат агенттігі хабарлайды.

Жағдайдың мән-жайы

Желіде тараған шағымда "Нұрлы жол" вокзалындағы дәретханалардың тазалығына қатысты мәселе көтерілген. Жарияланған суреттерде раковиналардың айналасындағы гранит үстелдердің сарғайып кеткені, еденнің бұрыштарында, есік жақтауларында кірдің жиналғаны байқалады. Сондай-ақ, унитаздың артқы жағындағы сарғыш дақтар мен қара іздер де көрініс берген.

"Қазақстан темір жолы" не дейді?

"Қазақстан темір жолы" (ҚТЖ) баспасөз қызметінің мәліметінше, санитарлық тораптардың тазалығы әр 60 минут сайын жүргізіледі. Қызметкерлер қажетті гигиеналық құралдармен, соның ішінде дәретхана қағазы, сұйық сабын, сондай-ақ арнайы тазалау құралдарымен қамтамасыз етілген. Компания өкілдері раковинадағы сарғайған дақтардың материалдың тозуынан және судың әсерінен пайда болғанын түсіндірді.

Вокзалдарды жаңғырту жоспары

ҚТЖ "Нұрлы жол" вокзалындағы санитарлық тораптарды жаңарту жұмыстары басталғанын хабарлады. Жоба жаңа дизайнмен және заманауи материалдармен жасалмақ. Бұл жолаушылар үшін кеңістікті жайлы әрі эстетикалық тұрғыдан жақсартуға бағытталған.

Бұған қоса, 2026 жылдың соңына дейін ҚТЖ еліміз бойынша 120-дан астам теміржол вокзалын жөндеуді жоспарлап отыр. Оның 37-сі апатты жағдайда деп танылып, сүріп тасталып, орнына жаңа ғимараттар салынады.