InfoHub Logo

Астанадағы жеңіл рельсті көлік (LRT) жолаушыларының пікірін білу үшін тілшіміз "Театр" станциясынан "Астана Арена" станциясына дейінгі бағытты жүріп өтті. Сапар барысында 20-дан астам жолаушымен сұхбаттасу мүмкіндігі болды. Олардың кейбірі бағаның 500 теңгеге көтерілуіне қарсы болса, енді бірі бұл бағаны қолайлы деп санайды.

Бұл туралы Infohub.kz ақпарат агенттігі хабарлайды.

Қазіргі таңда LRT-ға билет құны 200 теңге. Алайда, мамандар Дубай мен Ыстамбұл тәжірибесін алға тартып, бағаны көтеруді ұсынып отыр. Осыған байланысты, біз жолаушылардың ойын анықтауға тырыстық.

Жолаушылардың пікірі

Бағаның көтерілуіне қарсы шыққандардың бірі: "500 теңге тым қымбат болады. Жақында ғана ашылды, әлі бағасын орнықтыра қоймаған, ал қазір көтермекші", - деді.

Студенттер үшін 500 теңге қымбат екенін айтқан жолаушылар да болды. "Студенттер үшін 500 теңге қымбат. Ондайда таксимен жүру әлдеқайда тиімді болар еді", - деді олар.

Зейнеткерлер де бағаның өсуіне алаңдаулы. "Зейнетақы алатын адамға 500 теңге көп сияқты. Бұл бюджетке ауыр тиеді", - деп пікір білдірді.

Алайда, кейбір жолаушылар 500 теңгелік бағаны қалыпты деп санайды. "Бұл баға маған қолайлы сияқты. Кептеліс жоқ, тез әрі ыңғайлы жетуге болады", - деді бір сұхбаттасушы.

Бағаны көтеру себебі

Тарифтерді талқылауға экономикалық шолушы Олжас Байділдиновтің LRT-ға бірыңғай тариф жүйесін сынаған мәлімдемесі себеп болды. Оның айтуынша, бүкіл маршрут үшін 200 теңгелік бекітілген баға экономикалық тұрғыдан негізсіз және әділетсіз, себебі жобаның операциялық шығындарын да жаппайды.

Өз кезегінде, LRT жүйесін басқаратын "CTS" көлік компаниясы да 200 теңгелік тарифтің шығындарды толық жаппайтынын мойындады.