InfoHub Logo

Атырау қаласында 30 наурызда электр қуатының үзілуіне жауын мен электр желілеріндегі ластанған оқшаулағыштар себеп болды. Бұл туралы «Атырау Жарық» ЖШС хабарлады.

Бұл туралы Infohub.kz ақпарат агенттігі хабарлайды.

Компанияның мәліметінше, 6-10 киловольт кернеулі әуе желілерінде қысқа тұйықталулар орын алған. Олардың себебі – жауыннан кейін оқшаулағыштарда жиналған шаң мен басқа да ластанулардың сумен араласып, өткізгіш қабат түзуі.

Нәтижесінде, оқшаулағыштар бетімен ағып өтетін ток пайда болып, беткі разрядтар мен электр доғасы туындаған. Бұл желілердегі апаттық өшірулерге әкелді.

Жөндеу жұмыстары

Қазіргі уақытта әуе желілерінің бригадалары ластанған қабатты кетіру және оқшаулаудың электр беріктігін қалпына келтіру үшін оқшаулағыштарды тазалау жұмыстарын жүргізіп жатыр.

Кәсіпорынның ақпараты бойынша, зардаптарды жою үшін 10 авариялық-жөндеу бригадасы мен мамандандырылған техника жұмылдырылған. Жұмыстар тәулік бойы жүргізіледі.

Компания қалалық электр желілері қызметкерлері күшейтілген режимде жұмыс істеп жатқанын және жағдай бақылауда екенін хабарлады.