InfoHub Logo

Атырау облысы Жангелдин ауылындағы Қарабалиндер отбасының қазасына қатысты іс бойынша күдікті Сұлтан Сәрсемәлиевке жаңа айыптар тағылды. Бұған дейін екі немесе одан да көп адамды өлтіру бабымен тергелген іс енді қылмысты бірнеше рет жасағаны үшін де айыпталуда.

Бұл туралы Infohub.kz ақпарат агенттігі хабарлайды.

Атырау облыстық полиция департаментінің хабарлауынша, Сұлтан Сәрсемәлиевке Қылмыстық кодекстің 99-бабы 2-бөлігінің 1-тармағымен қатар, 13-тармағы – "бірнеше рет жасалған адам өлтіру" бабы қосылған. Бұған қоса, іс материалдарында бұрынғыдай 188-баптың 2-бөлігі бойынша "алдын ала сөз байласу арқылы адамдар тобы жасаған ұрлық" және 190-бап бойынша "алаяқтық" деректері де қарастырылып жатыр. Прокуратура бұл эпизодтардың марқұмдардың жеке мүлкін иемдену және малын заңсыз сату фактілерімен байланысты екенін мәлімдеді.

Қылмыстық кодекстегі саралау

Адвокат Абзал Қасымжановтың айтуынша, Қазақстан Республикасының Қылмыстық кодексінде "екі немесе одан да көп адамды өлтіру" және "бірнеше рет жасалған адам өлтіру" деген екі түрлі саралау белгісі бар. Біріншісі – бір оқиға аясында бірнеше адамның өлтірілуін білдірсе, екіншісі – әртүрлі уақытта және әртүрлі жағдайда жасалған қылмыстарды қамтиды.

Қандай жаза күтіп тұр?

Адвокат Абзал Қасымжанов істің қоғамда үлкен резонанс тудыруы мен күдіктінің шетелге қашуға әрекеттенуін ескере отырып, соттың ең қатаң жаза қолдануы мүмкін екенін айтты. Қалыптасқан сот тәжірибесіне сүйенсек, күдіктіге өмір бойына бас бостандығынан айыру жазасы тағайындалуы ықтимал.

Екінші адвокат, Самат Әбуев, адам өлтірумен қатар ұрлық және алаяқтық бойынша айыптардың сот үкіміне қалай әсер ететінін түсіндірді. Оның сөзінше, жаза қылмыстар жиынтығы негізінде белгіленеді, яғни жеңілірек жазалар қатаң жазаға қосылып есептеледі. Егер қылмыстың асқан қатыгездікпен жасалғаны дәлелденсе, сот өмір бойына бас бостандығынан айыру жазасын тағайындауы мүмкін. Дегенмен, нақты санкцияны сот істің мән-жайына қарай жеке белгілейтінін атап өтті.