InfoHub Logo

Ауғанстандағы билік басында отырған «Талибан» қозғалысы елде 9 жастан бастап қыздармен некелесуге рұқсат беретін заңды ресми түрде бекітті. Бұл туралы The Times газеті хабарлады.

Бұл туралы Infohub.kz ақпарат агенттігі хабарлайды.

Жаңа құжаттың мазмұны

«Жұбайлардың бөлек тұру қағидалары» деп аталатын жаңа құжатқа сәйкес, некеге тұру мүмкіндігі жыныстық жетілу жасына тікелей байланыстырылады. Ислам құқығының сунниттік мектебі бойынша, жыныстық жетілудің ең төменгі жасы – тоғыз жас деп есептеледі. Бұл құжатты «талибтердің» жоғарғы лидері Хайбатулла Ахундзада мақұлдап, ресми газетте жариялады.

Бұрынғы заңдар мен жаңа ережелер

Жаңа заң бойынша, жыныстық жетілу жасына толмай тұрмысқа шыққан қыздар тек «талибтер» соты арқылы ғана, белгілі бір шарттармен ажыраса алады. Бұл жағдайларға қызды тұрмысқа берген қамқоршылардың қатыгездік танытқаны, психикалық ауытқулары немесе моральдық жағынан нашарлағаны анықталса, тек сонда ғана ажырасуға мүмкіндік беріледі.

Бұған дейін Ауғанстанда қыздар үшін некеге тұрудың ең төменгі жасы 16, ал ұлдар үшін 18 жас болған. 2009 жылы қабылданған әйелдерге зорлық-зомбылықты жою туралы заң бойынша 15 жасқа толмаған қыздармен некелесуге тыйым салынған еді.

Құқық қорғаушылардың пікірі

Ауғанстанның «Rawadari» құқық қорғау ұйымының атқарушы директоры Шахарзад Акбар бұл заңның кәмелетке толмағандармен некелесудің бар екенін мойындайтынын және әйелдердің ажырасу мүмкіндігін айтарлықтай шектейтінін атап өтті. Оның айтуынша, бұл заңның басты мақсаты – әйелдердің күйеуінің келісімінсіз ажыраса алмауын қамтамасыз ету.

ЮНИСЕФ мәліметтері бойынша, Ауғанстанда 15-49 жас аралығындағы әйелдердің шамамен 28 пайызы 18 жасқа толмай тұрмысқа шыққан.