InfoHub Logo

Қазақстанда балаларды шетелге емдетуге жіберу көрсеткіші екі есеге қысқарады. Бұл шешім заманауи медициналық технологияларды енгізу арқылы жүзеге аспақ.

Бұл туралы Infohub.kz ақпарат агенттігі хабарлайды.

Үкімет отырысында Денсаулық сақтау министрі Ақмарал Әлназарова мәлімдеді. Соңғы үш жылда-ақ нәтиже байқалған: бағаналы жасуша трансплантациясы үшін өзге елдерге жүгіну 3 есеге, ал кардиохирургиялық көмекке жолдама беру 5,2 есеге азайған.

Жаңа технологиялар мен мүмкіндіктер

Министрлік мәліметінше, елімізде жыл сайын 2 мыңнан астам балаға жүрекке күрделі операция жасалады. Бұл — жоғары технологиялы көмектің Қазақстанда қолжетімді бола бастағанын көрсетеді.

Биыл медицина саласын дамытудың басым бағыттары ретінде йодтерапия, протондық терапия және тамырлы ақауларды жою әдістерін отандық клиникаларда толық қолжетімді ету жоспарланып отыр. Сонымен бірге ауруханаларда гибридті операциялық бөлмелер ашылып, жаңа технологиялар енгізілуде.

Сондай-ақ «гамма-пышақ» аппараты арқылы күрделі радиохирургиялық операциялар да сәтті орындалып жатқаны айтылды. Министрдің пікірінше, осы кешенді қадамдар балалардың шетелде емделу қажеттілігін айтарлықтай азайтып, сапалы медицинаның ел ішінде қолжетімді болуына жол ашады.