InfoHub Logo

Әлемге танымал қазақстандық блогер Кайсар Камза Вьетнамда ұсталғаны туралы ақпараттан кейін желіде видео жариялады. Ол өзінің Instagram парақшасындағы "Stories" бөлімінде жазба қалдырып, өзіне не болып жатқанын баяндады.

Бұл туралы Infohub.kz ақпарат агенттігі хабарлайды.

Видеода блогер жақында Қазақстанға барып келгенін, бірақ кейін Вьетнамның Нячанг қаласына қайта оралғанын айтты. Ол экстрадиция мәселесі бойынша шешім күтіп отырғанын және паспортын иммиграциялық қызметтің алғанын жеткізді. "Бәрі жақсы болады деп тілеңіздер. Осыны айтқым келді. Жақсы күндерде кездескенше!" – деді Камза.

Блогердің ұсталуы

Бұған дейін, 13 сәуірде Қазақстан Ішкі істер министрлігі хабарлағандай, халықаралық іздеуде жүрген блогер Кайсар Камза Вьетнамда ұсталған болатын. Ведомствоның мәліметінше, бұл операция Интерпол арқылы, қазақстандық және вьетнамдық құқық қорғау органдарының өзара іс-қимылы нәтижесінде жүзеге асқан.

Не үшін іздеу салынды?

Естеріңізге сала кетейік, биыл қаңтарда Құқықтық статистика және арнайы есепке алу порталында блогер Кайсар Камзаға қатысты іздеу парағы жарияланған еді. Іздеуді Қаржылық мониторинг агенттігі бастап, оны Астана қаласы бойынша Экономикалық тергеу департаменті жүргізген. Ресми ақпаратқа сәйкес, іздеу ісі 10 қаңтар 2026 жылы тіркелген.

Кейіннен блогердің заңсыз ойын бизнесіне көмектескені үшін күдіктелгені белгілі болды. ҚМ агенттігінің мәліметінше, Кайсар Камза шамамен бес жыл бойы Instagram желісінде "qais_arr" есімімен белсенді блогерлік қызмет жүргізіп, шамамен 2,4 миллион оқырманы болған. Сондай-ақ, ол "Қора энтертейнмэнт" атты жабық Telegram арнасын басқарып, оның аудиториясы шамамен 368 мың адамды құраған.

"Жеке әлеуметтік желі аккаунттарын пайдалана отырып, Қамза Қ.Б. Қазақстан азаматтарына арналған Pinco сайтындағы құмар ойындарға тіркелуге және қатысуға шақыратын сілтемелер мен жарнамалық материалдарды үнемі жариялап отырған. Сонымен қатар, видеолардың астында пайдаланушыларға бонустар беретін жеке промокодын орналастырған", – деп хабарлады ҚМ агенттігі.