InfoHub Logo

Газа аймағында ХАМАС-тың үстемдігіне қарсы бағытталған жаңа қозғалыс қалыптасып жатыр. Өзін «Халықтық күш» деп атайтын бұл қарулы топтың басында 30 жастағы Ясир Абу Шабаб тұр. Оның айтуынша, топтың басты мақсаты — гуманитарлық көмектің әділетті бөлінуін қамтамасыз ету.

Рафах маңындағы топтасқан жасақтар соңғы күндері гуманитарлық жүктерді күзетіп, олардың тұрғындарға жетуін қамтамасыз етуге тырысуда. Алайда бұл әрекеттер ХАМАС тарапынан қатаң қарсылыққа тап болып отыр. «Халықтық күштің» мәліметіне қарағанда, ХАМАС олардың жасақтарына шабуыл жасап, 50-ге жуық еріктінің өмірін қиды, олардың арасында Абу Шабабтың жақын туыстары да бар.

Айн Рабин, топ өкілдерінің бірі, Euronews агенттігіне берген сұхбатында былай деді:

«Біз қарулы жасақ емеспіз, біз ерікті азаматтармыз. Біздің мақсаты­мыз — гуманитарлық көмекті ұрлауға жол бермеу. ХАМАС біздің әрекетімізді өз билігіне төнген қауіп ретінде қабылдап отыр».

Ясир Абу Шабабтың өзі, Makan радиосына берген сұхбатында, «Халықтық күш» жасағы кейбір операцияларды Израиль әскерімен келісіп жүргізетінін растады. Алайда оның айтуынша, бұл тек ақпарат алмасу деңгейінде шектеледі:

«Біз қандай да бір аймаққа кіретініміз жайлы хабарлап отырамыз, бірақ әскери операцияны өзіміз атқарамыз. ЦАХАЛ оған тікелей қатыспайды».

Абу Шабаб Газа халқына үндеу тастап, ХАМАС-ты озбырлықпен билік жүргізіп отырған ұйым деп сипаттады және қажет болса, азаматтық қақтығысқа да баруға дайын екендігін жасырмады.

Сарапшылардың айтуынша, оның ашық медиаға шығуы — бұл топтың енді тек жергілікті әрекет етуші жасақ емес, саяси ықпалы бар құрылымға айнала бастағанын көрсетеді.

Ал ХАМАС «Халықтық күшті»» сатқындар тобы ретінде сипаттап, оны толық жоюға бағытталған операциялар жүргізіп жатыр. Газа тұрғындарының пікірі екіге бөлінді: бірі бұл топты «сатқын» десе, енді бір бөлігі оларды ХАМАС-тан құтқарушы ретінде қолдайды.