InfoHub Logo

Атышулы іс бойынша үй қамағында отырған бұрынғы жоғары лауазымды тұлға Олеся Кексельдің әуежайда жүргені туралы ақпарат әлеуметтік желіде тарап, көпшіліктің назарын аударды. Бұл жағдайға қатысты Бас прокуратура ресми түсініктеме берді.

Бұл туралы Infohub.kz ақпарат агенттігі хабарлайды.

Тергеу амалдарына қатысу үшін Алматыға барған

Бас прокуратураның мәліметінше, Кексель 20 ақпан мен 23 сәуір аралығында тергеу амалдарына қатысу үшін Алматы қаласында болған. Қажетті рәсімдер аяқталған соң, ол Астанаға оралған және үй қамағындағы бұлтартпау шарасы жалғасуда.

Әлеуметтік желідегі суреттер

Әлеуметтік желіде Кексельдің әуежайда түсірілген суреттері пайда болғаннан кейін, жағдайға қатысты наразылықтар айтылды. Суреттердің авторлары тергеу жалғасып жатқан кезде күдіктінің қалалар арасында еркін жүріп-тұруына жол берілгеніне таңданыс білдірген.

Кексельдің ісі

Олеся Кексель адамды азаптау ісіне қатысы бар деген күдікке ілінген болатын. Бұған дейін Бас прокурордың орынбасары Ғалымжан Қойгелдиев сот күдіктінің кішкентай сәбиі бар екенін ескеріп, үй қамағына алу туралы шешім қабылданғанын айтқан еді.

Олеся Кексель – құқық қорғау органдарында бұрын жоғары лауазымдарды атқарған тұлға. Ол Сыбайлас жемқорлыққа қарсы іс-қимыл ұлттық бюросының тергеу департаменті бастығының орынбасары қызметін атқарып, кейіннен Бас прокуратураның арнайы прокурорлар қызметін басқарған. 2017 жылы «Жыл мемлекеттік қызметкері» атағына ие болған.