InfoHub Logo

Елімізде ұялы телефондарды тексеру тәсілі өзгеруі мүмкін. Жекеменшік компаниялардың орнына бұл функцияны мемлекеттік ұйым атқаратын болады. Бұл туралы Цифрлық даму, инновациялар және аэроғарыш өнеркәсібі бірінші вице-министрі Ростислав Коняшкин мәлімдеді.

Бұл туралы Infohub.kz ақпарат агенттігі хабарлайды.

Мемлекеттік монополияға көшу

Вице-министрдің айтуынша, бұл мәселе үкімет деңгейінде қаралған және қағидаттық шешім қабылданған. Енді телефондарды тексеру қызметін 100% мемлекеттік компания атқаратын болады.

«Қазіргі таңда бұл мәселе үкіметтің қатысуымен қаралды. Телефондарды тексеру қызметін мемлекеттік ұйым көрсететін болады деген шешім қабылданды», - деді Коняшкин.

Оның сөзінше, бұл үшін қажетті заңнамалық өзгерістер әзірленіп жатыр. Олар Мәжілісте қаралып, мақұлданса, мемлекеттік компания бұл қызметті атқаратын болады.

Тұтынушылардың шағымдары

Бұған дейін қазақстандықтар ұялы құрылғыларды IMEI кодтары арқылы міндетті түрде тексеруге қатысты шағымдарын білдірген болатын. Депутат Болатбек Нажметдинов үкіметке ресми сауал жолдап, бұл рәсімді конкурстан тыс, ресми мәртебесі мен құқықтық негізі жоқ жеке компанияның жүзеге асырып отырғанына алаңдаушылық білдірген еді.

Еске сала кетейік, бұған дейін Қазақстанда ұялы құрылғыларды тіркеу ережелері жаңартылған болатын. Абоненттік құрылғыларды тіркеуде ақ, сұр және қара тізімдер енгізілді. Ақ тізімге тексеруден өткен және деректер базасына енгізілген құрылғылар кіреді. Сұр тізімге қосымша тексеруді талап ететін, бірақ желіде уақытша, 30 күнге дейін жұмыс істеуге рұқсат етілген аппараттар енгізілді. Қара тізімге дұрыс емес немесе өзгертілген сәйкестендіру коды бар, зауыттық IMEI нөмірі жоқ немесе GSMA халықаралық қара тізіміне енгізілген құрылғылар кірді.

Алайда, кейіннен әлеуметтік желілерде смартфондарды тіркеуге қатысты қазақстандықтардың шағымдары көбейді. Шетелден немесе қолдан сатып алынған телефондардың «кірпішке» айналып жатқаны туралы ақпараттар тарады. Жүйе IMEI кодтарын қабылдамай қойды, ал нарықта делдалдар 30-50 мың теңгеге мәселені шешуді ұсынып үлгерді.