InfoHub Logo

Марқұм Яна Легкодимованың анасы қызының өліміне кінәлі деп танылған сотталғандардың жазасын қай жерде өтеп жатқанын білмек болған. Алайда, Қылмыстық-атқару жүйесі комитетіне жүгінгенмен, нақты жауап ала алмады.

Бұл туралы Infohub.kz ақпарат агенттігі хабарлайды.

Ресми жауапта сотталғандардың заңды күшіне енген үкім бойынша жазасын өтеп жатқаны ғана айтылған. Ал олардың нақты қай мекемеде отырғаны құпия ақпарат ретінде қалдырылды. Комитет сотталған адамның басқа мекемеге ауыстырылғаны туралы мәлімет тек жақын туыстарына немесе сотталған адамның өзі көрсеткен адамдарға берілетінін түсіндірді. Жеке іс құжаттарындағы деректердің жария етілмейтіні де айтылды.

Түрлі болжамдар мен ресми жауаптың жоқтығы

Қазір сотталғандардың қайда жазасын өтеп жатқанына қатысты түрлі болжамдар айтылуда. Бұған дейін олардың өмір бойына бас бостандығынан айырылғандар отыратын «Қара бүркіт» мекемесіне жіберілгені туралы ақпарат тараған еді. Алайда, бұл дерек те, кейін шыққан басқа бейресми ақпараттар да ресми түрде расталмады.

Ананың үміті мен талабы

Галина Легкодимова мұндай сұрауды жай қызығушылықпен емес, қызын өлтірген адамдардың заңда қарастырылған тиісті мекемеде жазасын өтеп жатқанына көз жеткізу үшін жолдағанын айтты. Ол жаңа өмір бастап, басқа қалаға көшіп, әрі қарай өмір сүруді үйренгісі келеді. Алайда, бұл оқиға әлі де оның жанын мазалап жүр. Ол сотталғандардың өмір бойына бас бостандығынан айыру жазасын өтеп жатқанын және мұндай қылмыс жасаған адамдарға арналған жағдайда отырғанын білу маңызды екенін атап өтті.

Қайғылы оқиғаның мән-жайы

Еске сала кетейік, қайғылы оқиға 2024 жылдың 18 қазанында болған. Яна Легкодимова танысының қоңырауынан кейін үйінен шығып кеткен. Ол тіпті сырт киімін де алмапты. Қыз көлікке отырғаннан кейін оны ешкім көрмеген. Анасы іссапардан оралған соң бірден дабыл қаққан. Тергеу кезінде полиция Яна Легкодимованың күнделігін тауып, онда Р. есімді жігіттің аты аталғанын анықтаған. Кейін осы дерек арқылы 24 жастағы Ризуан Хайржанов пен 25 жастағы Алтынбек Қамитов анықталған.