InfoHub Logo

АҚШ ұлттық барлау басшысы Тулси Габбард Иранның жаңа жоғарғы көшбасшысы Моджтаба Хаменеидің Израильдің әуе шабуылы кезінде ауыр жарақат алғанын мәлімдеді. Бұл туралы Infohub.kz ақпарат агенттігі хабарлайды.

«Ол израильдіктердің бомбалауынан қатты жарақат алды», - деді Габбард АҚШ Конгресі Өкілдер палатасының барлау комитетіндегі тыңдауда.

Оның айтуынша, қазіргі уақытта Иран басшылығында кімнің шешім қабылдайтыны белгісіз.

Бұған дейін Иран Сыртқы істер министрі Аббас Аракчи Al Jazeera-ға берген сұхбатында Иранның жоғарғы көшбасшысы Моджтаба Хаменеидің жеңіл жарақат алғанын және қазір жағдайы жақсы екенін айтқан болатын.

Өткен бейсенбіде ведомство өкілі Эсмаил Багаи аятолланың жарақат алғанын хабарлап, зақымның сипатын көрсетпеген еді. Сол күні Хаменеи ирандықтарға АҚШ пен Израильдің шабуылдарынан қаза тапқандар үшін кек алатынына уәде берген.

«Ол халыққа қашан және қалай хабарлайтыны – мәлімдеме жасау арқылы ма, әлде жеке кездесуде ме – шешімін өзі қабылдайды. Менің қолымдағы ақпарат бойынша, ол толық сау-саламат», - деді Аракчи.

Дипломат сондай-ақ, Хаменеидің ядролық қаруға қатысты ұстанымын күтуге шақырды. Оның қайтыс болған әкесі кезінде оны иеленуге тыйым салатын пәтуа шығарған болатын. Иран Тегеранның талаптарына сәйкес келетін келісім бойынша ұсыныстарды тыңдауға дайын.

АҚШ пен Израильдің Иранға қарсы операциясы үшінші аптаға созылуда. Осы уақыт бойы тараптар бір-біріне соққы беріп келеді. Тель-Авив Иранның ядролық қару алуына жол бермеуді мақсат еткенін мәлімдеді. Вашингтон елдің әскери әлеуетін жоюға уәде беріп, азаматтарды режимді құлатуға шақырды.

Ал Иран қорғануға дайын екенін және әзірге келіссөздерді жаңартудың мәнін көрмейтінін атап өтті.