InfoHub Logo

Үкімет үйіндегі кезекті отырыс ерекше сәтпен есте қалды. Премьер-министр Олжас Бектенов Жасанды интеллект және цифрлық даму вице-министрі Ростислав Коняшкиннің әрекетіне сүйсініп, оны әріптестеріне үлгі етті. Шенеуніктің мемлекеттік тілде мүдірмей сөйлеуі Үкімет басшысының назарынан тыс қалмады.

Ростислав Коняшкин мінберге көлік-транзит саласын цифрландыру мәселелері бойынша баяндама жасауға шыққан болатын. Көпшілік оны әдеттегідей ресми тілде сөйлейді деп күткенімен, вице-министр сөзін бастан-аяқ қазақ тілінде жеткізді.

Мұны көрген Олжас Бектенов ризашылығын жасырмады.

«Жақсы, қазақша баяндадыңыз. Дұрыс, үйрену керек», — деді Премьер-министр қысқа әрі нұсқа қайырып.

Баяндама не туралы болды?

Вице-министрдің сөзінше, елімізде цифрландыру қарқынды жүріп жатыр. Қазіргі таңда көлік-транзит саласындағы 38 мемлекеттік қызметтің барлығы толығымен онлайн форматқа көшкен.

Статистикаға сүйенсек, 2024 жылы көрсетілген қызметтердің 94 пайызы электронды түрде жүзеге асқан. Коняшкиннің пікірінше, бұл қарапайым халық пен бизнес өкілдері үшін уақыт үнемдеуге және бюрократияны азайтуға үлкен септігін тигізіп отыр.

Бектеновтен «бәрекелді» естіген алғашқы шенеунік емес

Айта кетейік, бұл министрлікте мемлекеттік тілге деген құрмет ерекше жолға қойылғанға ұқсайды. Биылғы ақпан айында Олжас Бектенов дәл осы ведомствоның тағы бір өкілі — Дмитрий Мунды мақтаған еді (ол қазір де вице-министр лауазымында).

Сол кезде Дмитрий Мун уәдесінде тұрып, баяндамасын мемлекеттік тілде жасағаны үшін Үкімет басшысынан «сөзінде тұратын жігіт» деген жоғары баға алған болатын. Бұл үрдіс басқа мемлекеттік қызметшілерге де жақсы ой салуы мүмкін.