InfoHub Logo

Танымал актриса Жұлдыз Әбдікәрімова қызы Алаудың туған күніне арнап, әлеуметтік желіде ерекше жазба қалдырды. Актриса қызына деген сүйіспеншілігін білдіріп, оның өмір жолының жарқын болуын тіледі.

Бұл туралы Infohub.kz ақпарат агенттігі хабарлайды.

Ананың жүрек сөзі

«Ақылды бұзығымның туған күні! Қызым, сен күлгенде әлем гүлденіп кетеді, қабақ түйсең – күннің өзі мұңаяды, ал еркелеген сәттерің жүрекке жылу сыйлайды», – деп бастады актриса өз жазбасын. Ол Алаудың әр қырының өзіне ерекше жарасатынын атап өтті. Кейде ересектерше ойланып, кейде балаша шаттанып күлетін қызының бойжеткендей әнге басатынын да айтты.

«Сен – менің ең үздік нұсқамсың»

Жұлдыз Әбдікәрімова қызын өмірдегі ең басты тірегі деп атап, оған ата-анасы мен ата-әжесінің бар жақсы қасиеттері дарығанын айтты. «Өмір жолың ашық, ғұмырың ұзақ болсын! Біз әрдайым сенің жаныңнан табылып, қолдап-қорғап жүреміз. Отбасың сені шексіз жақсы көретінін ұмытпа», – деп аналық мейірімін төкті актриса.

Желі қолданушылары да Алауды туған күнімен құттықтап, жылы лебіздерін білдіруде.