InfoHub Logo

Мәжіліс депутаты Даулет Мұқаев әйелін туған күнімен құттықтап, оған Парламенттен берілгеніне ұқсас құжатты табыстаған видеодан кейін туындаған дауға қатысты пікір білдірді. Бұл туралы Infohub.kz ақпарат агенттігі хабарлайды.

Желіде тараған видеода депутат әйеліне құттықтау қағазын ұстатып жатқан көрінеді. Кейбір желі қолданушылары бұл құжаттың ресми парламенттік хатқа ұқсастығын айтып, депутаттың Парламент атрибуттарын жеке мақсатта пайдаланғанын сынға алды.

Депутаттың жауабы

Мәжіліс депутаты Даулет Мұқаев журналистердің бұл әрекетінің этикалық нормаларды бұзу-бұзбағаны туралы сұрағына жауап берді. Ол видеодағы құжаттың ресми құттықтау емес, өзінің жеке құттықтауы болғанын айтты.

«Менің қолымдағы көк қалта – жеке құжаттарымды салатын қалта. Оның дизайнын өзім жасап, мәтінін жазып, 5 мың теңгеге бастырдым. Бұл – менің әйеліме деген жеке құттықтауым болды», - деді Мұқаев.

Оның айтуынша, бұл әрекет Парламент регламентін бұзу болып саналмайды. Себебі, ресми бланкілерді рұқсатсыз пайдалануға тыйым салынғанымен, бұл жағдайда тек қалта туралы сөз болып отыр. Сонымен қатар, құттықтау жұмыс уақытынан тыс, жеке шарада жасалған.

Әлеуметтік желідегі пікірлер

Депутат бұл мәселенің әлеуметтік желіде 9-10 мамыр күндері талқылана бастағанын және бұл белгілі бір тапсырыс болуы мүмкін екенін жоққа шығармады.

Бұған дейін мәжілісмен Ардақ Назаровтың Парламент отырысы кезінде анасын құттықтауы дау тудырған болатын.