InfoHub Logo

Орал қалалық мәслихатының депутаттары қоғамдық көліктегі жол жүру ақысы мен қоқыс шығару қызметінің тарифтерін көтеру туралы қала әкімдігінің ұсынысын жақын арада өтетін сессияның күн тәртібінен алып тастады. Бұл шешімге 16 депутаттың 13-і дауыс берді.

Бұл туралы Infohub.kz ақпарат агенттігі хабарлайды.

Неліктен тарифтерді талқылаудан бас тартты?

Депутаттар қала әкімдігі мен олардың мердігерлерінің ұсынып отырған тарифтерінің негізділігіне күмән келтірді. Олардың айтуынша, әкімдік тарапынан берілген ақпараттар жеткіліксіз және компаниялардың шығындарын есептеу әдістемесі айқын емес. Мәслихат депутаты Константин Свешниковтің айтуынша, бұл мәселе қаланың 372 мың тұрғынының мүддесіне қатысты болғандықтан, шешім қабылдау үшін толыққанды деректер қажет.

Қандай талаптар қойылды?

Депутаттар жолаушылар тасымалдайтын компаниялардың қаржылық есептілігін, алған субсидияларының көлемін, шығындарының құрылымын, соның ішінде жанар-жағармайға жұмсалған шығындарды есептеу әдістемесін талап етті. Сондай-ақ, барлық тасымалдаушы компаниялармен жасалған келісімшарттардың толық мәтінін ұсынуды сұрады.

Әкімдіктің жауабы

Қала әкімдігі жол жүру тарифтерін көтеру қажеттілігін тасымалдаушылардың шығындарының кірістерінен асып түсуімен және субсидиялардың жеткіліксіздігімен түсіндірді. Алайда, депутаттар бұл уәждерді толық негізді деп таппады.

Басқа да мәселелер

Депутат Асланбек Аминов безналичный төлем жүйесі операторы «Смарт қала» ЖШС комиссиясының 9%-дан 15%-ға дейін бір жақты көтерілгеніне назар аударды. Ол бұл туралы БАҚ-тан білгенін айтып, компания басшылығын шақырып, барлық есеп-шоттарды ашуды ұсынды.

Қалалық мәслихат төрағасы Есентай Калиев тарифтерді талқылаудан алып тастауға қарсы болғанымен, дауыс беру қорытындысы бойынша депутаттардың шешімі басымдыққа ие болды.