InfoHub Logo

Қарағанды облысының 90 жылдық мерейтойы аясында облыстық тарихи-өлкетану музейі ауқымды жаңартудан кейін салтанатты түрде ашылды. 13 наурыз күні өткен шарада өңірдің көне заманнан бүгінге дейінгі шежіресі заманауи технологиялар тілінде сөйледі.

Бұл — соңғы 13 жыл ішіндегі ең ауқымды реэкспозиция жобасы. Музей енді тек жәдігерлер жиынтығы емес, жоғары технологиялы мультимедиялық кеңістікке айналған. Мұнда тарихи жәдігерлер голограммалар, проекциялық жүйелер және интерактивті киоскілермен үйлесім тапқан.

Келушілер архивтік құжаттарды сарғайған қағаздан емес, сенсорлық экрандар арқылы парақтап, сирек экспонаттар туралы толық ақпаратты цифрлық форматта ала алады. Бұл әсіресе жас буын мен туристер үшін тарихты танудың жаңа мүмкіндігі болмақ.

Сарыарқаның 13 залдағы шежіресі

Жаңартылған экспозиция 13 залды қамтиды. Көрме көшпелі империялар дәуірінен басталып, Тәуелсіз Қазақстанның қалыптасу кезеңіне дейінгі уақытты қамтиды. Археологиялық олжалар мен қола дәуірінің бірегей жәдігерлеріне арнайы орын бөлінген.

Ұйымдастырушылардың айтуынша, жобаның басты мақсаты — өңірдің индустриалды даму жолын және Сарыарқаның әлемдік тарихтағы орнын жаңаша көзқараспен көрсету. Музей енді облыстың басты туристік маршруттарына енгізілмек.