InfoHub Logo

Айтыскер ақын Мұхамеджан Тазабек журналист Жанар Байсеміздің YouTube арнасындағы сұхбатында Қазақстанның тұңғыш президенті Нұрсұлтан Назарбаевқа қатысты пікірін білдірді.

Бұл туралы Infohub.kz ақпарат агенттігі хабарлайды.

Ақынның айтуынша, оның көзқарасы белгілі бір тұлғаларға емес, жалпы билік жүйесіндегі құндылықтар мен басқару мәдениетіне бағытталған. Ол Назарбаевқа, Тоқаевқа немесе басқа да билік басындағыларға емес, биліктің жалпы құндылықтарына назар аударатынын атап өтті.

Тұңғыш президентке деген үміт

Тазабек «Тұңғыш президент» ұғымын отбасындағы тұңғыш баламен салыстырды. Оның пайымынша, отбасындағы тұңғыш балаға ерекше үміт артылатыны секілді, елдің алғашқы басшысына да кең мүмкіндік пен айрықша өкілеттік берілген.

Ақынның ойынша, сол кезеңде билік бір орталыққа шоғырланып, маңызды шешімдер көбіне бір жүйенің айналасында қабылданды. Дегенмен, ол өткен дәуірдегі қателіктерді тек бір адамның атымен байланыстыруды әділетсіз деп санайды.

Қателіктерді саралау

«Назарбаевтың өзі де кадр мәселесінде де, басқа шешімдерде де қателіктер болғанын мойындаған. Кеңестік тапшылықтан кейін халық молшылыққа ұмтылды. Бұл бір адамның ғана әрекеті емес, тұтас қоғамның талпынысы еді», – деді Мұхамеджан Тазабек.

Оның айтуынша, 90-жылдар мен өтпелі кезеңде қоғамда әркім өз мүддесін күйттеген жағдайлар көп болды. Кейбір ықпалды азаматтар мен шенеуніктер мемлекет мүлкіне жеке меншігіндей қарады.

Тазабек билік жүйесіндегі кемшіліктерді түсіну үшін жеке тұлғаларды ғана емес, сол ортаны қалыптастырған қоғамдық сана мен құндылықтарды да саралау қажет екенін айтты.

«Қателіктерді бір адамға ғана таңу дұрыс емес. Патшаның жанындағылар да сол ортаны қалыптастырады. Төмен ойлайтындар адамдарды талқылайды, орташа ойлайтындар оқиғаларды сөз етеді, ал жоғары ойлайтындар құндылықтарды саралайды дейді. Сондықтан мен барынша құндылық тұрғысынан ойлауға тырысамын», – деді ақын.

Осылайша, Мұхамеджан Тазабек Назарбаев кезеңіне баға бергенде эмоцияға берілмей, сол дәуірдегі қоғамдық ахуал мен билік мәдениетіне назар аудару керек деген ойын жеткізді.