InfoHub Logo

Металл өндіруші «Қазақмыс» корпорациясы Aidarly Project компаниясындағы үлесінен бас тартты. Бұған дейін бұл компанияны миллионер Нұрлан Артықбаев басқарған болатын. Енді Aidarly Project акцияларының бір бөлігін Владимир Ким мен Эдуард Огайдың Qaz Copper Group компаниясы иеленеді.

Бұл туралы Infohub.kz ақпарат агенттігі хабарлайды.

Акционерлік құрамдағы өзгеріс 18 ақпанда тіркелді. Qaz Copper Group-пен қатар, Aidarly Project компаниясының ірі акционері ретінде Нидерландыда тіркелген Aidarly B.V. қала берді.

Qaz Copper Group кімге тиесілі?

Qaz Copper Group – бұл Kazakhmys Copper компаниясының еншілес ұйымы. Айта кетейік, бұған дейін Ким мен Огай «Қазақмыс» корпорациясын дәл осы Kazakhmys Copper арқылы иеленген болатын.

Өткен желтоқсанда Kazakhmys Copper компаниясының меншік иелері ауысқан еді. Нидерландыда тіркелген K.C.C. B.V. компаниясының орнына МФЦА-да тіркелген KCC Copper Limited келді. Ал бұл компанияны қазір Ким мен Огай иеленетін Kazakhmys Holding Limited холдингі бақылайды.

Aidarly Project-тің жағдайы

2025 жылдың қараша айында «Қазақмыс» компаниясы өзінің активтерінің бір бөлігін жаңа заңды тұлға – Qaz Copper Group-қа бөлгенін хабарлаған болатын. Бұл компанияға негізгі табыс әкелмейтін, яғни өндірумен тікелей байланысты емес активтер берілді. Сондай-ақ, компания Қарағанды облысындағы Соқырқой кен орнында мыс пен полиметалл өндіруге арналған келісімшарт бойынша жер қойнауын пайдалану құқығын алды.

2024 жылы Aidarly Project компаниясы 5,4 млрд теңге шығынға ұшырады. Ал 2023 жылы бұл көрсеткіш 4,3 млрд теңге болды. 2024 жылдың соңындағы Aidarly Project-тің жабылмай қалған шығыны 9 млрд теңгеге жетті (2023 жылдың соңында бұл көрсеткіш 3,6 млрд теңге болған). Компанияның жарғылық капиталы 2,9 млрд теңге болғанын ескерсек, оның капиталы теріс 6,1 млрд теңгеге тең болды.

Aidarly Project-тің шығынға ұшырауына негізгі себеп – Абай облысындағы Айдарлы кен орнында геологиялық барлау жұмыстарын жүргізіп, кейін мыс кентабын өндірумен айналысуы. Компанияның мыс кентабын барлау және өндіру туралы келісімшарты бар.

Естеріңізге сала кетейік, 2025 жылдың соңында Владимир Ким мен Эдуард Огай «Қазақмыс» компаниясын «Qazaq Stroy» құрылыс компаниясының иесі Нұрлан Артықбаевқа сатқаны белгілі болды. Мәміле құны ашық жарияланбады. Bloomberg агенттігінің мәліметінше, бизнесменге 1,2 млрд доллар көлеміндегі қаржыны швейцариялық саудагер Mercuria Energy Group ұсынған.