InfoHub Logo

Қазақстанда ипотекалық несие алу қазақстандықтардың ең үлкен қаржылық түйткілдерінің бірі болып отыр. Ұлттық банк төрағасы Тимур Сүлейменов қазіргі қолданыстағы ипотека пайыздарын «тым жоғары» деп атады.

– «10, 15 немесе 20 жылға берілетін ипотеканың 25 пайыздық мөлшерлемесі – өте үлкен жүктеме. Мәселен, 10 жылдық несие алсаңыз да, артық төлем орасан зор болады. Мұндай ауыртпалықты әр отбасының көтере алуы – үлкен сұрақ», – деді Сүлейменов.

Оның айтуынша, жуырда ипотека пайызын 25 пайыздан 20 пайызға дейін төмендету мәселесі қаралған. Алайда нақты шешім әзірге қабылданған жоқ.

– «Менің кеңесім – егер сіз шарттарға сәйкес келсеңіз, мемлекеттік бағдарламаларды пайдаланған дұрыс. Ал басқасы үшін базалық мөлшерлеменің төмендеуін күтуге тура келеді. Өйткені нарықтағы ипотекалық мөлшерлеме соған тікелей байланысты», – деді Ұлттық банк төрағасы.

Қазір қазақстандықтар ипотека бойынша ең жоғары төлемнің әлемдік деңгеймен салыстырғанда әлдеқайда қымбат екенін жиі сынға алып жүр.