InfoHub Logo

Қазақстанда шетелден, әсіресе Ресей, Қырғызстан және Өзбекстаннан әкелінген телефондарды тіркеу қиындап, жаппай бұғаттаулар орын алуда. Бұл жағдай тұтынушылар мен сатушылардың наразылығын тудырып отыр.

Бұл туралы Infohub.kz ақпарат агенттігі хабарлайды.

Телефондарды тіркеудегі қиындықтар

Сатушылардың айтуынша, телефондарды тіркеу кезінде IMEI кодтарын жүйе қабылдамай қойған. Бұл тек жаңа құрылғыларға ғана емес, 4-5 жыл бұрын сатылған телефондарға да қатысты болып отыр.

«Клиенттер де, біз өзіміз де ақшамызға алған құрылғыларды пайдалана алмаймыз. Тексеру формальды түрде тегін болғанымен, процесс күрделі. Сондықтан адамдар тіркеуден өту үшін басқаларға 30-50 мың теңге төлеуге мәжбүр. Қазір тіпті заң қабылданғанға дейін сатып алынған смартфондар да жұмысын тоқтатты», - дейді сатушы Әнел Ерғазинова.

Жаңа талаптар мен оның салдары

Кәсіпкерлердің сөзінше, жаңа норма енгізілгеннен кейін екінші нөмірді орнатқан кезде жүйе тексеруді талап етеді. Олсыз құрылғы «сұр тізімге» еніп, бір айдан соң бұғатталады. Мұндай мәселеге тап болған сатып алушылар кімге жүгінерін білмей дал болуда.

Компания жауабы

Қазақстанда телефондарды тіркеумен жеке «ATS Mediafon KZ» ЖШС айналысады. Алайда, кәсіпкерлер тіркеуге өтінім қабылдайтын сайттың дұрыс жұмыс істемейтінін айтады. Компания өкілі бұл пікірмен келіспейді.

«Телефонның шыққан еліне байланысты бұғаттау болмайды. Құрылғының заңды түрде әкелінгенін растайтын құжаттар бізге жеткілікті. Егер телефондар талаптарға сәйкес әкелініп, ресімделсе, олар еш қиындықсыз тексеруден өтеді. Кедендік тіркеусіз және қажетті төлемдерсіз әкелінгендер тіркелмейді. Жеке тұлғалар үшін тіркеу тегін, ал кәсіпкерлер бір құрылғы үшін 4325 теңге төлейді», - дейді ЖШС коммерциялық директоры Мәди Шерім.

Компания кәсіпкерлермен диалогқа дайын екенін мәлімдеді. Ал сатушылар тіркеумен мемлекет айналысуын талап етуде.