InfoHub Logo

Елімізде ресми жұмыс істемеген, еңбек өтілі жоқ және зейнетақы жарнамасын төлемеген азаматтарға қандай көлемде зейнетақы төленеді? Бұл сұраққа Бірыңғай жинақтаушы зейнетақы қоры (БЖЗҚ) жауап берді.

Бұл туралы Infohub.kz ақпарат агенттігі хабарлайды.

Зейнетақының қалыптасуы

БЖЗҚ мамандарының айтуынша, жинақтаушы зейнетақы тек жеке тұлғаның зейнетақы жарнамалары мен инвестициялық табыстары есебінен қалыптасады. Егер мұндай жарнамалар болмаса, қордан ешқандай төлем тағайындалмайды.

Сондай-ақ, 1998 жылғы 1 қаңтарға дейінгі еңбек өтілі жоқ азаматтарға бірыңғай зейнетақы да берілмейді. Демек, ресми жұмыссыздық пен зейнетақы жарнамаларының болмауы жағдайында, азаматтарға тек базалық зейнетақы тағайындалады.

2026 жылғы базалық зейнетақы мөлшері

2026 жылы базалық зейнетақының ең төменгі мөлшері еңбекке жарамсыздық бойынша белгіленген ең төменгі күнкөріс деңгейінің 70 пайызын құрайды. Бұл шамамен 35 596 теңге болады.

Базалық зейнетақының мөлшері зейнетақы жүйесіне қатысу өтіліне байланысты. Егер өтіл 10 жылдан асса, әр жыл үшін төлем 2 пайызға артады. Алайда, еңбек өтілі мүлдем болмаған жағдайда ең төменгі мөлшердегі төлем тағайындалады.

Бұған дейінгі ақпараттар

Бұған дейін Еңбек және халықты әлеуметтік қорғау министрлігі 2025 жылдың қорытындысы бойынша Қазақстандағы зейнетақының орташа мөлшерін хабарлаған болатын. Ол кезде орташа жиынтық зейнетақы 143 143 теңге болса, оның ішінде бірыңғай зейнетақы – 95 549 теңге, базалық зейнетақы – 47 594 теңгені құрады.

2026 жылғы 1 қаңтардан бастап базалық және бірыңғай зейнетақылар, сондай-ақ мемлекеттік жәрдемақылар республикалық бюджет туралы заңға сәйкес 10 пайызға индекстелді.