InfoHub Logo

АҚШ Қазақстанға ресейлік мұнайды Қытайға транзиттеуге рұқсат берген лицензияны 2027 жылдың наурызына дейін ұзартты. Бұл туралы Bloomberg агенттігі хабарлады.

Бұл туралы Infohub.kz ақпарат агенттігі хабарлайды.

Транзит жалғасады

АҚШ Қаржы министрлігімен келіссөздер жүргізгеннен кейін бұл рұқсат 2027 жылдың 19 наурызына дейін ұзартылды. Бұл лицензия Қазақстанға жаһандық мұнай нарығындағы тұрақсыздыққа қарамастан, ресейлік мұнай көлемін Қытайға тасымалдауды жалғастыруға мүмкіндік береді.

Бұған дейінгі рұқсат биыл сәуірге дейін жарамды болған еді. Қазіргі таңда Қазақстан жылына шамамен 10 миллион тонна ресейлік мұнайды Қытайға транзиттейді. Бұл тәулігіне шамамен 200 мың баррельді құрайды. Тараптар бұл көлемді жылына 12,5 миллион тоннаға дейін арттыру мүмкіндігін талқылап жатыр.

Қазақстан үшін маңызы

Мұнай-газ саласының сарапшысы Асқар Исмаиловтың айтуынша, АҚШ-тың арнайы лицензиясынсыз ресейлік мұнай транзитіне тыйым салынар еді. 2025 жылы «Роснефть» санкцияға іліккеннен кейін, онымен кез келген операциялар, соның ішінде Қазақстан мен «Қазтрансойл» үшін де тәуекелді болды.

Өткен жылдың қараша айында Қазақстан Энергетика министрлігі АҚШ-қа мұнай транзитін сақтап қалу үшін арнайы рұқсат сұрап жүгінген болатын. Алдымен оны 2026 жылдың сәуіріне дейін берген, енді ұзартылды.

«Бұл Қазақстанға не береді? Транзиттелетін мұнай көлемі жылына шамамен 10 миллион тоннаны құрайды. Қазір 12,5 миллион тоннаға дейін өсуі талқылануда. «Қазтрансойл» бұдан жылына 150-190 миллион доллар табыс табады. Ал АҚШ үшін бұл мұнай бағасының өсуін тежеудің тағы бір құралы болып табылады, өйткені нарық қосымша мұнай көлемімен қамтамасыз етіледі», - деп түсіндірді Исмаилов.