InfoHub Logo

Қазақстанның ең қария тұрғыны, Түркістан облысының Түркістан қаласында тұратын Ақәлi Есiмханқызы биыл 116 жасқа толды. Ол өмірдің мәні мен ұзақ ғұмырдың құпиясын бөлісті.

Бұл туралы Infohub.kz ақпарат агенттігі хабарлайды.

Еңбек пен отбасы – ұзақ ғұмырдың кепілі

Ақәлi әже өмірін отбасына арнаған. Ол өзінің ұзақ ғұмырының құпиясы – еңбекқорлық пен жақындарына деген сүйіспеншілік дейді. Жұбайы Аязбай екеуі балаларын тәрбиелеп, оларға үлгі болуға тырысқан.

Отбасы – әженің өмірінің мәні және сенімді тірегі. Бүгінде Ақәлi әженің 15 немересі мен 25 шөбересі бар.

«100 жастан астым. Осы жылдар ішінде қаншама оқиға болды. Қасымда балаларым, немерелерім мен шөберелерім барына қуаныштымын. Бар ойым – олардың амандығы», – дейді қария.

Әже әлі де белсенді

Туыстарының айтуынша, әже ешқашан денсаулығына шағымданбаған. Ақәлi әже үнемі белсенді болуға тырысып, отбасына тамақ дайындауға көмектеседі.

«Әрине, бұрынғыдай емес, жасы келген сайын шамасы келгенше қимылдайды. Бірақ үйде отырып қалмайды, үй ішін аралап, кейде аулада серуендейді. Тіпті тамақ пісіруге де көмектеседі. Бос отырғысы келмейді», – дейді келіні Раушан Теңізбаева.

Өмірге деген позитивті көзқарас

Өзгелерге пайдалы болу – қарияның басты ұстанымы. «Өмірге деген позитивті көзқарас пен отбасының қолдауы маған күш береді», – дейді Ақәлi Теңізбаева.