InfoHub Logo

Шымкент зоопаркінде кішкентай бала қояндардың арнайы бөлінген аумағына кіріп кеткен. Видеода баланың жануарларды қуып, қорқытып, олармен бірге суретке түсіп жатқаны көрінеді. Бұл әрекеттер жануарларға стресс әкеліп, тыныштығын бұзады.

Бұл туралы Infohub.kz ақпарат агенттігі хабарлайды.

Зоопарк қызметкерлерінің айтуынша, баланың қораға кіруіне анасы көмектескен. Оқиғадан кейін күзет қызметі бейнебақылау жазбаларын қарап, келушілердің кім екенін анықтады. Баланың ата-анасымен түсіндіру жұмыстары жүргізіліп, зоопарк ережелері мен жануарларға ұқыпты қарау қажеттілігі ескертілді.

Ережелерді бұзудың салдары

Зоопарк аумағында қоршаудан өтуге тыйым салатын ескерту белгілері бар екеніне қарамастан, бұл талаптар елеусіз қалған. Зоопарк әкімшілігі жануарлардың үйі – зоопарктің тек ойын-сауық орны емес екенін атап өтті. Әрбір келушінің ережелерді сақтауға жауапты екендігін баса айтты.

Балалардың қауіпсіздігі

Зоопарк келушілерді балаларын мұқият қадағалап, оларды қараусыз қалдырмауға шақырды. Қораларға кіруге тыйым салынатыны және балалардың қауіпсіздігіне ерекше назар аудару қажеттігі ескертілді.

Бұл оқиға соңғы айда Қазақстан зоопарктеріндегі келушілердің тәртіпсіздігі туралы екінші резонансты жағдай. Бұған дейін Семейде ересектер балалардың көзінше арыстан қорасын таспен атқан болатын.