
- 03 апр. 2025 08:24
- 44
Таяу Шығыста шиеленіс: Түркия әскер кіргізген сәтте Израиль Хомсты бомбалады
Таяу Шығыстағы жағдай тағы да ушыға түсті. Түркия әскері Сирия аумағына кіріп жатыр деген ақпарат тарап жатқанда, Израиль әуе күштері Хомс провинциясындағы Т-4 әскери әуе базасына соққы жасады.
Жергілікті БАҚ мәліметінше, шабуыл жасалған аймаққа түрік әскери бөлімдері жетіп үлгерген. Қазіргі уақытта бұл әрекеттердің арасында қандай байланыс бар екені белгісіз. Алайда сарапшылар Түркия мен Израильдің Сириядағы мүдделері әртүрлі екенін айтады.
Түркия өз шекарасына жақын орналасқан күрд жасақтарына қарсы әскери операциялар жүргізуді көздесе, Израиль Иранмен байланысты нысандарды нысанаға алып отыр. Т-4 базасы бұған дейін де Израиль шабуылдарының нысанасына айналған болатын.
Сирия билігі әзірге ресми мәлімдеме жасаған жоқ. Ал Түркия тарапы әскери операциялары жайлы толық ақпарат бермей отыр. Таяу Шығыстағы жағдайдың қалай өрбитіні белгісіз, алайда сарапшылар бұл текетірес аймақтағы жаңа шиеленіске ұласуы мүмкін екенін жоққа шығармайды.