قازاقستان شەكاراسىندا ءقاۋىپتى كارانتيندىك وبەكتىلەرمەن زالالدانعان 113 توننادان استام ءونىمنىڭ اكەلىنۋىنە جول بەرىلمەدى. يران مەن رەسەيدەن كەلگەن سالات، ارپا جانە قىزاناق پارتيالارى فيتوسانيتاريالىق باقىلاۋ كەزىندە توقتاتىلدى، دەپ حابارلايدى infohub.kz سايتى.
اۋىل شارۋاشىلىعى مينيسترلىگىنىڭ مالىمەتىنشە، ماڭعىستاۋ وبلىسىنداعى «تەمىر-بابا» اۆتوموبيل وتكىزۋ بەكەتىندە يراننان كەلگەن سالماعى 9،9 توننا «ايسبەرگ» سالاتىنىڭ پارتياسىنان باتىس گۇل ءتريپسى (Frankliniella occidentalis) انىقتالدى. ءدال وسى ءقاۋىپتى كارانتيندىك زيانكەس اقتوبە وبلىسىنداعى «جايسان» باقىلاۋ بەكەتىندە رەسەي فەدەراسياسىنىڭ ورىنبور وبلىسىنان كەلگەن كولەمى 0،7 توننا «ايسبەرگ» سالاتىنىڭ پارتياسىنان تابىلدى.
سونىمەن قاتار، رەسەي فەدەراسياسىنان اكەلىنگەن جالپى كولەمى 100 توننا ازىقتىق ارپانىڭ ءۇش پارتياسىنان اۋىل شارۋاشىلىعى القاپتارىنا ءقاۋىپ توندىرەتىن كارانتيندىك ءارامشوپ — جورعا مارال (Acroptilon repens) انىقتالدى.
اقتوبە وبلىسىندا رەسەي فەدەراسياسىنان كەلگەن سالماعى 3 توننا قىزاناق پارتياسىن تەكسەرۋ كەزىندە ماماندار بىردەن ەكى كارانتيندىك وبەكتىنى انىقتادى: وڭتۇستىكامەريكالىق قىزاناق كوبەلەگى (Tuta absoluta) جانە قىزاناق جەمىسىنىڭ قوڭىر ءبۇدىر ۆيرۋسى (Tomato brown rugose fruit virus).
اتالعان دەرەكتەر بويىنشا حاتتامالار تولتىرىلىپ، ماتەريالدار سوتقا جولدانىپ، ايىپپۇلدار سالىندى.